Едногласно со крената рака „ЗА“ денеска советниците на Советот на општина Гевгелија гласаа за одобрување на Одлуката за доделување парична помош за семејството од опожарената куќа во Гевгелија.
Предлог-Одлуката ја доставија како дополнување на дневниот ред на денешната редовна 39-та седница на Советот на општина Гевгелија членовите на советничката група на ВМРО-ДПМНЕ предводени од д-р Патрик Матх.
Одлуката содржеше предлог за одвојување еднократна финансиска помош за опожарената куќа наменета за домување во сопственост на Цвета Брљамова на улица „Солунска“ бр. 16 во Гевгелија.
– „Целта на одлуката е од хуман аспект да се помогне на фамилијата која доживеа несакан настан со опожарување на стамбена куќа наменета за домување“ наведуваат предлагачите на предлог-Одлуката.
Носењето на одлуката ќе значи Буџетска исплата на 300.000 денари до семејството на опожарената куќа и 33.333,- денари за исплата на персонален данок, законска обврска која ја превзема повторно Општината на терен на локалниот Буџет, или севкупните буџетски импликации се 333.333,- денари одговор од Советот на општината за хуманите и животни потреби на 5-то членото семејство.
Семејството на Цвета и Кире Брљамови се во постапка на отварање донаторска сметка, па ќе можат и други стопански субјекти, фирми, поединци да донираат за создавање нов дом за нивното семејство со трите малолетни деца.
