Вчера во Градскиот парк во Скопје се одржаа традиционалните 25-ти по ред маратонски и полумаратонски трки „Шри Чинмој“ (Шри Чинмој трка на мирот на единство-домот) на кои учество зедоа над 302 атлетичари, меѓу нив и петорица од АК „7ми Ноември“ Гевгелија.
Подиум освои само Валентина Узунова, ВТОРО место во категорија жени 55+.
Таа трасата за полумаратон во должина од 21,1 километар ја истрча со време од 2 часа 16 минути и 06 секунди. Инаку во севкупниот пласман меѓу женските атлетичарки Валентина го има 30-то место. Но, нели и годините се важни за напорот кој вложува оваа 57 годишна неуморна атлетичарка од Југот, па во својата возрасна категорија е неприкосновен освојувач на подиуми.
Искачувајќи се на подиумот Валентина го развеа знамето со логото на болните од Пулмонална хипертензија за чија поддршка и видливост на нивните здравствени проблеми и потреби таа ги посветува сите свои спортски настапи.
На полумаратонот учество зедоа 171 атлетичари, од кои 43 жени.
На маратон 31 тркачи од нив 5 жени.
Спортскиот настан е од меѓународен карактер и на истиот учествуваа и атлетичари од други држави: имаше натпреварувачи од Романија, Србија, Бугарија, Грција.
![](https://gevgelijanet.com/wp-content/uploads/2024/03/AK-7-noemvi-750x536.jpg)
На полумаратонската трка „Шри Чинмој“ учество зедоа уште четворица гевгелиски атлетичари под знамето на АК „7 Ноември“. Еве ги по редослед на нивниот пласман:
1. Благојче Темелковски – 1:52:11 (65-то место во категорија полумаратон мажи)
2. Драган Ристов – со време 1:55:45 (69-то место, полумаратон мажи)
3. Кристијан Зумровски – време 1:57:53 (75 место, полумаратон мажи)
4. Борче Крстовски Илијоски 2:14:23 (108-мо место, полумаратон мажи)
Патеката беше кружна со должина од 1.735 m и се трчаат 12 круга (за полумаратон) и 24 круга (маратон).
Драган Ристов за своето ново спортско достигнување на социјалните мрежи напиша:
– „Не се натпреварувам со остатокот од светот. Се натпреварувам само со себе бидејќи мојот напредок е моја вистинска победа. – Шри Чинмој. Трет завршен полумаратон овој месец, денес на 25-тото издание на Шри Чинмој маратонот“
Сите учесници на маратонот во Скопје од организаторот „Шри Чинмој маратон тим“ добија ранец со логото и името на настанот, стартен број со чип за мерење на време, маица, медал за учество на трката, хартиена диплома, пехари за победниците (прво, второ и трето место) и дигитални фотографии.
Гевгелиските атлетичари се вратија дома со ЕДЕН освоен ПЕХАР, ПЕТ МЕДАЛИ и ПЕТ ДИПЛОМИ.
Честитки!