Министерката за животна средина Каја Шукова пред жителите од Милетково, вчера го најави почетокот на изградба на канализација во ова населено место.
Средствата во висина од 4.000.000 денари се веќе обезбедени во Буџетот на МЖСПП, за изведба на првата фаза од проектот. Министерството веќе го потпиша договорот со општина Гевгелија, која е задолжена да распише тендер за избор на најповолен изведувач.
Целата инвестиција за изведба на канализација во с.Милетково чини 300.000 евра и е финансиски влог на Министерството за животна средина за ова населено место.
Посетата на министерката беше повод за прашања од граѓаните за нивните потреби во селото. Жителка на Милетково се пожали што возот од Гевгелија до Скопје не застанува во Милетково, иако порано се застануваше, примаше патници. Ова им го отежнува користењето на железничкиот превоз до Скопје и назад.
Друг жител се пожали на високите сметки за струја во последните три месеци. Вели дека се грее на дрва, дома користи струја само за електирчни апарати, што е нормално, а му доаѓаат сметки од 4.500 до 9.000 денари за месец. Ова вели е случај и кај други жители на селото.
Министерката го објасни процесот на либерализација на железничкиот сообраќај, а сметките за струја од повеќе корисници од селото, за повеќе месеци со високи износи побара да и’ бидат испратени за да лично ја провери состојбата и начинот на ваквото задолжување на граѓаните со високи сметки за струја.
Средбата се одржа пред селската продавница. На средбата со жителите на Милетково министерката Шукова беше придружувана од локални членови на Совет на општина Гевгелија.
