Една од најстарите архитектонски градби од јавен карактер во Гевгелија е Железничката станица која датира од 1874 година. Изградена во 19 век, реконструирана во првата половина од 20 век, а со модерното време на динамика и се’ поголемата потреба од транспортни услуги и реконструкцијата на Железничката станица стана потреба.
Со средства од проектот „ЕУ за тебе“ обезбедени преку Делегацијата на Европската Унија и донација од Шпанската Влада, Владата на Македонија започна целосна реконструкција на 10 железнички станици во државата од кои 6 на коридор 10 и 4 на коридор 8. Најголеми зафати се направени на железничката станица во Гевгелија, бидејќи ова е најстар објект заштитен со одлука од Републички завод за заштита на споменици на културата.
На увид на последните завршни работи денеска во Гевгелија присуствуваше д-р Венко Филипче, носител на листата на СДСМ за ИЕ-4, генералниот директор на Македонски железници – инфраструктура Зоран Трифуновски, помошникот директор за сообраќај на МЖ-инфраструктура Никола Марков и кандидатката за пратеник од СДСМ Гевгелија Елизабета Стефановска.
![](https://gevgelijanet.com/wp-content/uploads/2024/05/ZS-3-750x500.jpg)
Раководните лица им ги покажаа на гостите завршните работи изведени на железничката станица во Гевгелија, современите градежно-технички зафати за зајакнување на статиката на објектот, задржување на фасадното обележје како културно-историски споменик, современото електронско опремување со техника, климатизери, модерни тоалети, соби за работа и престој на граничните царински службеници од Грција со кои соработува МЖ Македонија.
Објектот треба да има технички прием и за дестина денови треба да биде пуштен во употреба за граѓаните, корисници на железничкиот патнички сообраќај.
![](https://gevgelijanet.com/wp-content/uploads/2024/05/ZS_6-750x500.jpg)
Посетата на гостите од Скопје на гевгелиската железничка станица не помина незабележано од гевгеличани. Постари граѓани дојдоа и поставија прашања и на раководителите и на носителот на изборната листа д-р Филипче. Беа услужени со одговор, дека реконструкцијата во Гевгелија подолго траела заради тоа што објектот е под заштита на РЗЗС и за секој зафат треба одобрување од истиот Републичкиот завод за заштита.
Граѓаните заедно со гостите ја продолжија прошетката низ новореновираните простории на железничката станица и изразија задоволство од направеното. „Да му служи на народот. За арно, оти ова е направено за народот“ – коментираа гевгеличани.
Филипче и кандидатката за пратеник Стефановска се упатија и во централната соба за регулирање на железничкиот сообраќај каде научија дека се’ е автоматизирано и електронски контролирано, со задолжителни две команди за да не дојде до несреќни случаи.
– „Ваков систем на електронска команда треба да воведеми и во транспортот со Грција, а сега тоа е на хартија, со размена на документи“ – им објасни на гостите Никоал Марков, помошниот директор за сообраќај.
Железничката станица е историско-културен реликт, а таква е и најстарата локомотива која е изложена пред Железничката станица во Гевгелија. Гостите ја разгледаа, направија фотографии, а д-р Филипче не одолеа да се качи, да влезе во локомотивата и да го осети чувството на историјата.
Гевгелија, веќе два века е поврзана со железничка линија со Европа и светот. Продолжува да биде дел од европската трансферзала со блискоста на пристаништето во Солун и комбинацијата со поморскиот и железничкиот транспорт. Новиот пратеник д-р Венко Филипче се интересираше и за потребата и можноста за отварање на нов граничен премин со Грција од Гевгелија према Идомени.
Така е, гостите кажаа што е ново, што е завршено и што да очекуват гевгеличани во сферата на железничкиот сообраќај, кој е осмислен да функционира за потребите на граѓаните.