По повод шест годишнината од смртта на гевгелискиот патник кон „капата на светот“ – врвот „Монт Еверест“, во неделата планинарите од ЗПСК „Кожуф“ заедно со бројни вљубеници на природата го реализираа шестиот по ред Меморијал за д-р Ѓорги Петков.
Планинарите во чест на својот колега по висините д-р Петков го искачија врвот „Мала рупа“ (2.004 мнв) што се наоѓа на Кожуф планина. Овде е поставено и пригодно спомен обележје уште на првиот Меморијал, реализиран од членовите и клубски другари на Петков, од ЗПСК „Кожуф“.
Првиот Меморијал се одржа на 15 декември 2018 година, а следните години на датата на неговото „заминување“ кон висините. Овој Меморијал е традиционален и истиот е од републички ранг, нотиран во годишната програма на ЗПСК „Кожуф“ и дел од програмата на Федерацијата на планинарски спортови на Македонија.
Д-р Петков беше долгогодишен член на ПД „Кожуф“ од Гевгелија, посветен на планините, висините, со фокус на највисоките алпинистички предизвици од светската мапа на врвови, кои имаше зацртано да ги искачи, а успеа да запише пет врвови од светскит континенти. После Еверест беше со намера да го искачи и највисокиот врв на Антартикот. Но…
Хималајскиот портал „Тајмс“ од Непал на 20 мај 2018 година ја објави жалната вест за смртта на македонскиот алпинист Георги Петков кој од 24 март тргна на мисија за освојување на највисокиот врв на светот Монт Еверест. Два месеци престојуваше во ледените кампови во пазувите на Химлаите, приближувајќи му се на Еверест до последните 1.000 метри од врвот.
Замина со својот сон за висините, д-р Ѓеорги Петков, почина на 7.800 мнв на дофат до својот највисок алпинистички неостварен сон.
„Незаборав за тебе, голем човеку!“ – искажуваат твоите клубски другари, планинарите од Гевгелија!
