Релативно младиот мандолински оркестар од с.Јосифово, Валандовско „Полифонија“ неделава учествуваше на Интернационалниот мандолински фестивал во Измир Турција каде освен аплаузите и овациите на публиката од нивните настапи беа вратени да свират на бис.
Врв на музичкото доживување за неуморната публика од нивниот настап беше изведбата на композицијата „Libertango“ на Astor Piazzolla, a во аранжман на Nobuyuki Hayashi. Директорот на фестивалот освен личните честитки и посвета за учество на македонскиот оркестар на овој реномиран музички настан во Турција, до диригентот и водител на оркастарот проф. Раденко Костадинов упати барање во име на публиката да ја изведат композицијата повторно на бис.
Еве ја изведбата на Либертангото што ја освои публиката и оваациите упатени до инструменталистите од валандвско Јосифово, од Македонија.
Оркестарот „Полифонија“ постои една година и месец дена, а зад себе веќе има настапи не само на локални манифестации, туку и во регионот и на државни настапи. Ова им е прв меѓународен настап каде што се единствени учесници од Македонија и ја претставуваат музичката култура на Македонија.
Во својот концертен настап 17те членови на оркестарот имаа класични и модерни музички изведби:
1. „Суита 17“ од Богдан Шиндилоски Данче,
2. „Game of trones“ Ramin Dijavadi,
3. „Libertango“ на Astor Piazzolla
4. „Ракатка 10“ сплет на македонски народни песни, аранжман Стеван Мокрањац,
5. „Петровка“ композитор Раденко Костадинов
6. „Сербез Донка“ македонска народна песна, аранжман Драган Вељковиќ.
Професорот Раденко Костадинов е долгогодишен музички образовен кадар кој својата љубов кон музиката несебично ја споделил меѓу учениците каде што ја обавувал својата професорска и наставна дејност, во Гимназијата „Гоце Делчев“ во Валандово, во ООУ „Јосип Броз Тито“ исто во Валандово, во ООУ „Страшо Пинџур“ во с. Јосифово, валандовско во кои што го поминал целиот свој работен век со музиката и педагошката дејност.
Минатата година неговите ученици му приредија величествен концерт во големата концертна сала во Валандово во знак и поздрав за неговото пензионирање. Радоста од изненадувањето, од настапот од споделените емоции со професорот и публиката не сакаа да завршат тука.
– „Професоре ние овој концерт го направивме за Вас, но не сакаме да престанеме со музиката. Сакаме уште да свириме, да настапуваме, ајде да не водите Вие, да продолжиме заедно иако сме некогашни ваши ученици, дури и од различни генерации!“ – беше молбата на учениците кон нивниот професор на крајот од опроштајниот концерт за неговото пензионирање.
И, душата музичка, не можеше да не прифати. Овие деца ја засакаа музиката, ги засакаа своите инструменти, греота е да се одвојат од нив, а некој да не ги подгрева нивните љубопитства со нови композиции, нови аранжмани, сесеќава професорот Костадиновски. И за еден месец настана оркестарот „ПОЛИФОНИЈА“ основан од Здружението за музичка наобразба „Полифонија стрингс“ од с.Јосифово.
Претседател на оваа асоцијација и истакнат член на оркестаорт е Александар Павловски кој вели дека мотивот за ваквиот ангажман на овие 20-на членови на оркестарот е длабоко хуман.
– „Со нашата работа, музицирање и настапи сакаме да и’ вратиме малку на средината која не’ створила, на луѓето од нашата заедница, парче убавина и хармонија која може да ја пружи убавата музика, пренесувајќи чуства на возвишеност, величественост, милост, љубов. Ова е наш чин на себеоплеменување и на средината во која живееме, но и презентација на нашите можности во средините каде што настапуваме“ – изјави за GevgelijaNet нашиот соговорник Александар Павловски.
Да се има ваков подстрек од учениците за професорот кој се прости од училишните клупи, а учениците од различни генерации да сакаат уште да работат со него е секако професионален дострел на еден образовен работник.
Раденко скромно изјавува дека целиот живот го посветил на музичката наобразба на децата и е благодарен што тие ја засакале и после завршувањето на школскиот час. Овие реакции на учениците не се случајни. Во текот на својата кариера проф.Костадиновски остварил учества на многу настапи, државни натпревари со училишните оркестри и освоил 12 награди на национално и меѓународно ниво. „Полифонија“ е нов предизвик во кој гледа нови дострели на оваа генерација инструменталисти зошто не чекаат ноти од професорот, сами ги пишуваат, се подготвуваат и гордо настапуваат под знамето на Македонија.
Оркестарот е составен од изведувачи на мандолина, мандолии, гитари и Контрабас. На настапите учествуваат 17 членови, а уште тројца млади тренираат да се приклучат во многузвучниот оркестар „Полифонија“.
Ние им посакуваме уште настапи, уште аплаузи, неуморни музицирања за бис изведби!
„Полифонија“ пред гевгелиската публика се претстави по повод денот на Сесловенските просветители, а ќе настапат повторно на програмата на гевгелиското културно лето 2024, па можете да се уверите во сето изречено и напишано.
