Нашите млади фудбалски сили од ФК „Кожуф“, родени 2011 и 2012 година во заеднички тим предводен од тренерот Трајче Ников во силна меѓународна конкуренција се пласираа на 9-то место на „Elite Youth Tournament“ што се одржа во Катерини, Р.Грција.
Тренерот Ников вели дека ова е најреспектабилен собир на елитни тимови од Европа, нивните подмладоци и настапот на „кожуфци“ е големо искуство за децата фудбалери, но и голем дострел за нив во ова спортско друштво на елитни млади фудбалери.
Гевгелиските 12 и 13 годишни фудбалери ги вкрстија копачките со победникот на турнирот, екипата на „Leeds Utd“ од Англија, со кои што се изборија за резултат 1:0.
- „Нашиот тим играше во Групата „G“ каде што го освоивме првото место, пред славниот „Лидс Јунајтед“ од Англија, со 5 победи и само еден изгубен натпревар. За напомена е дека „Leeds Utd“ го освоија турнирот без порази понатаму, освен поразот кој го доживееја од екипата на ФК „Кожуф“ 2011/12 од Гевгелија“ изјави за GevgelijaNet тренерот Ников.
– „Со тоа се пласиравме во „Golden“ групата, заедно со „Crvena Zvezda“ и „АЕК“ од Атина, каде што го освоивме третото место“ – додава Ников.
– „Загубивме од „Crvena Zvezda“ со 3:0 и последната од „АЕК“ Атина со 1:0 каде што нашите деца беа многу подобар противник, но на крајот немаа среќа. Овој натпревар беше пренесуван од страна на организаторот во живо на нивниот youtube канал“ – потенцираше Ников за интересот на натпреварот кои тие го одиграа со атинскиот клуб.
Се’ на се’, од 56 екипи учеснички на турнирот од ова возрасна група 2011/12 во извонредно јака конкуренција, помеѓу реномирани фудбалски подмладоци на познатите тимови „Leeds Utd“, „Crvena Zvezda“, „АЕК“, „Panatanaikos“, „PАОК“, „Volos“, „Olimpijakos“, „Deportivo La Korujna“ и многу други фудбалски школи и клубови нашите деца од „Кожуф“ 2012/12 го освоија 9-то место.
– Ова е голем успех за нас. Прв пат учествуваме на ваков тип на турнир со толку голем број на учесници. Секоја чест за дечињата што се носеа рамо до рамо со многу други познати екипи и секако, ќе ја паметат победата која ја освоија над англискиот тим „Leeds Utd“, победа за сеќавање за цел живот, бидејќи навистина беа најјак тим, што се покажа и на крајот со освојувањето на победничкиот трофеј од турнирот“ – беа пофалните зборови што ги искажа задоволниот тренер Ников од младите фудбалски надежи на „Кожуф“.
Тимот на ФК „Кожуф“ под водство на тренерот Трајче Ников, го сочинуваат: Душан Петров, Филип Лазаров, Стефан Петровски, Костантин Танчевски, Јован Проданов, Мартин Димитров, Леонид Стоев, Михаил Каспаров, Антонио Митров, Ѓорѓи Петров, Ристе Андреев, Виктор Митренцев, Иван Чавдаров и Јован Карагонов.
Честитки за напорот и за пласманот на 9-то место меѓу елитните клубови на Европа „Elite Youth Tournament“!
