Вчерашното најавено невреме од УХМР со поројни дождови, грмотевици и врнежи од град не беше единствената грижа за жителите на југот. Некои уште пред невремето се соочија со пожари, па и опожарувања од удар на гром.
Екипа на ТППЕ Гевгелија вчера интервенираше на три опожарени локации.
Првата беше во атарот на с.Мрзенци каде гореше дива депонија. Повикот за пожар беше примен во 09.45 часот и едно ПП возило со три пожарникари веднаш се упати на терен за гаснење. Интервенцијата беше успешна, а пожарот целосно изгаснат.
Втората интервенција на противпожарната единица во Гевгелија беше во 13:40 часот по примена дојава дека гори сува трева меѓу куќите од улица „Никола Карев“ и т.н. улица „Новопланирана“. Жителите во оваа мало беа видно вознемирени бидејќи огнот дивееше токму пред нивните порти. Екипата на ТППЕ Гевгелија учествуваше во гаснењето на пожарот со 2 ПП возила и 6 пожарникари присутни на терен. Пожарот беше целосно ликвидиран.
Третиот пожар настана попладнето, во текот на невремето со поројни дождови и грмотевици. Имено, од удар на гром се опожари викендица во атарот на општина Богданци, во т.н. област „Трнката“ во близина на бензинската пумпа „Шимов“. Екипата на ТППЕ Гевгелија се упати да интервенира на терен по дојавата, некаде во 18 часот со 2 ПП возила и 5 пожарникари, со дотур на вода во текот на интервенцијата. Гореше горниот кат од викендицата.
- „Беше чудно, дожд врне, кровот гори, а ние гаснеме. Ниту дождот не можеше да ја спаси куќата“ – беше реакцијата на пожарникарите од страотниот пожар по ударот на гром во богданско.
Пожарот е изгаснат. За среќа нема човечки жртви. Штетите се материјални, изгоре горниот спрат од викендицата. Засега нема извештај за претрпената штета, истиот е во подготовка.
