Сувата вегетација, топлото време и раздвиженоста на луѓето, невнимателно палење на оган на отворено се фактор за појава на пожари на отворен простор во ова летно време. Тоа најдобро го знаат и чувствуваат пожарникарите кои мораат со полна опрема да се приближат до огнот и да започнат акција за гаснење.
Такви интервенции пожарникарите од ТППЕ Гевгелија вчера имаа дури три во еден ден: гореше во Богданци во полето крај стариот пат Богданци-Стојаково, гореше шумата кај Кованец, се отиде на помош на ТППЕ Неготино во гаснење на големиот пожар во областа Пепелиште.
Денешниот извештај гласи: пожарот кај Богданци е ликвидиран во текот на вчерашниот ден, пожарот кај Кованец е локализиран, шумскиот пожар кај Неготино со воздухопловната поддршка од Хеликоптерската единица од МВР изгаснаати се опасните краци на пожарот.
- „ТППЕ Гевгелија најпрво интервенираше на пожарот во Богданци со 2 ПП возила, едно теренско возило и 8 пожарникари. Тоа беше во 11 часот. Во 12:30 добивме дојава за пожар во шумскиот предел кај селото Кованец, гевгелиско. Нашите сили се упатија таму со едно ПП возило и 4 пожарникари. На терен беа и 14 вработени од Шумско стопанство „Кожуф“ од Гевгелија со три теренски возила. Во текот на денот уште 6 пожарникари беа присутни на терен и со помош на дрон го следеа движењето на пожарот. До 19:30 успеавме да го локализираме пожарот и истиот да не претставува опасност за селото, имотите, нивите“ – изјави за GevgelijaNet командирот на ТППЕ Гевгелија Игор Ризов.
Поради ширината на опфатот на пожарот и непристапниот терен гевгелиската ТППЕ морала да употреби и дрон за надгледување на границите на шумскиот пожар кај Кованец. Имало две непристапни точки, високи карпи со густа жбунеста вегетација. Истите пожарникарите ги локализирале и оставиле на немилост на огнот.
– „До настапот на ноќта пожарот беше ставен под контрола, а го надгледуваа вработени на ШС „Кожуф“. Се проценува дека има изгорена мешана шума од даб, смрека и габер на површина од 60 до 70 хектари. Материјална штета кон жителите на Кованец нема, но големи се загубите на шумска вегетација, кое е наше национално добро“, додаде командирот н ТППЕ Гевгелија, Ризов.
Денеска теренот на опожарениот простор кај Кованец е повторно надгледуван од 06 до 08 часот од сили на ТППЕ Гевгелија, а после 08 часот понатаму од вработени на ШС „Кожуф“. Опожарениот простор догорува. Малата присутност на воздушно струење не ги остава на мир вработените поради можноста за разгорување на недогорените шумски стебла после интервенцијата на пожарникарите.
Лето е, топло е, гори воздухот на +40 степени, бесповратно гори и националното добро, нашите шуми.
Да бидеме внимателни при престојот во природа, да не се пали оган на отворено при присуство на сува вегетација која за секунда пламнува во опасен пожар, препорачуваат од ТППЕ Гевгелија!!!
