Пожар кај граничниот премин “Евзони” изби денеска на пладне. Потребата за брза интервенција предизвика одлука на грчките погранични служби да престанат со работа, односно да го запрат меѓуграничниот промет на патници и возила од ГП “Богородица” кон Грција и обратно.
Колоните возила, патнички автомобили и тешките товарни возила кои чекаат за излез, се приморани да запрат, стојат во место. За влез во Македонија исто има колони кои стојат на грчка страна.
На терен кај запалениот простор кај ГП „Евзони“ бргу беа испратени грчки воздушни сили за гаснење, така што во моментот се гаси со хеликоптер.
Огнот со помош на ветрот се шири на грчка територија.
Во приправност да се спречи “влез” на пожарот на територијата на Македонија е и тим на ТППЕ Гевгелија со противпожарно возило и опрема.
Минатата година пожарот во месноста на село Богородица се „прелеа“ и на грчка територија, па македонските и грчките пожарникари зедно гаснеа за да се ликвидира заканата од пошироко опожарување на теренот.
Ваква беше сликата на пладне на „Евзони“, активноста на пожарот се гледаше и од македонска територија.
По повеќе од два часа застој на меѓуграничниот промет на Граничните премини „Богородица“ РМ – „Евзони“ Р.Грција, патниците кои чекаа два часа на сонце од +40 степени го пренасочија своето патување кон ГП „Дојран-Дојрани“. Овој граничен премин го користат и возилата кои се враќаат од Грција за влез во Македонија.
