Одбележувањето на 121 годишнината од Илинденското востание и 80 годишнината од одлуките за државноста на АСНОМ-ска Македонија во Гевгелија означени со историски час и израз на благодарност до револуционерите-ослободители со цвеќе и наклон.
Со букети цвеќе делегации на следбеници на историските вредности од Општинскиот Сојуз на борците и поддржувачите на НОБ од Гевгелија и Богданци, со присуство на претставници од јавниот и политичкиот живот им оддадоа признание на борците од Гевгелија и гевгелиско по повод националниот празник Илинден.
Цвеќе за народните херои од НОБ од гевгелиско, на носителите на Партизанска соменица, на Споменикот на комитата и војвода од гевгелиско Сава Михајлов, на Спомен костурницата на паднатите жртви што ги даде Гевгелија во виорот на Народноослободителната борба на овие простори, вчера, во пресрет на Илинден, положија делегации на Здружението на борците од Гевгелија, од Општина Гевгелија, претставници на локалниот општински Совет, Здружението на пензионерите, претставници на политичките партии од општината.
Со наклон за хероите и жртвите на едно бурно време до формирањето на македонската државност пред спомениците почит оддадоа граѓани и локални следбеници и поддржувачи на историските вредности и традиции на двојниот Илинден.
Со пригодна беседа пред присутните за виорот на историските збиднувања на 2 август 1903, Илинденското востание и 2 август 1944, заседанието на АСНОМ се обрати Тања Трајковска, историчар. Свое обраќање имаше и секретарот на Општинската Организација на Сојузот на Здружението на Борците од НОБ од Гевгелија, Ангел Алчинов.
Со честитките за Националниот празник тој особено испорача благодарност до борците за македонската државност, илинденците, учесниците на НОБ и нивната несебична пожртвуваност за слобода.
Честит празник! Да ни’ е вечен Илинден!
