Со прелети на шест ангажирани ер-трактори попладнево над пожарот кај Фурка огнената стихија не е ставена под контрола, јавуваат од ЦУК.
Вечерва, директорот на ЦУК Стојанче Ангелов изјави дека дејствувано е со 6 ер-трактори но резултатот не е добар – пожарот се’ уште е активен. Таму дејствувано е со 14 пожарникари од ТППЕ Гевгелија, со неколку ПП возила за дотур на вода, 6-мина доброволци, 4-ца вработени од Национални шуми, подружница „Кожуф“ Гевгелија, 4 припадници на АРМ кои ја бранат ближната Караула близу опожареното подрачје, вработени од Дирекцијата за заштита и спасување.
- „Во моментот гори нискостеблеста шума и сува трева. Штетата не е голема, но пожарот се гледа од повеќе страни и глетката е непријатна“ – оцени Ангелов.
За непријатната и вознемирувачка глетка во овие ноќни часови доказ повеќе се фотографиите од пожарот кај Погана што ги направи локалниот фотограф од страната на с.Мрзенци, Гоце Тасевски. Глетката е колоритна, но знаејќи дека пожарот ја пустоши природата, зеленилото и живиот свет не е пријатна. Пожарот на Погана продолжи во северозападен правец кон село Грчиште и е видлив и од автопатот А1, и од населеното место Прдејци, и од Негорци.
Утринава беа испратени и два хеликоптера за гаснење на пожарот на Погана, но поради силниот ветер интервенцијата беше одложена.
И ноќва остануваат активни пожарите кај Погана и Фурка во атарот на општина Богданци. И вечерва и утре грижата за пожарите остануваат на локалните ПП сили и доброволци.
