Трет ден гори во Богданци, втор ден гори во атарот на Фурка. Според командирот на доброволното противпожарно друштво од Валандово кој е на местото на пожарот, таму постојано се слушаат детонации од неексплодирани убојни средства од Втората светска војна, што е голем безбедносен проблем при гаснењето на пожарите.
На социјалната мрежа Х се објавени видеа од пожар за кој во објавата се вели дека е во близина на Богданци и дека гори борова шума. На видеата се гледа голем облак од чад и пламени јазици што се издигаат високо.
„Зошто многу малку, скоро ич денес не се зборува за пожарот кај Богданци? На Телма не го ни спомнаа. Дали е мал пожар? Цела борова шума изгоре. Цела вечер гореше. Видеата се од пред еден саат“, стои во објавата.
Зошто многу малку, скоро ич денес не се зборува за пожарот кај Богданци? На Телма не го ни спомнаа. Дали е мал пожар? Цела борова шума изгоре. Цела вечер гореше. Видеата се од пред 1 саат. pic.twitter.com/bCpLQU6fkm
— Ајс Ти (@IceBucks7) August 5, 2024
Во текот на денот кога пожарот од Фурка стаса до високите јаворови дрвја на патот Фурка – Богданци сообраќајот беше запрен.
Фурка кон Богданци. Во Богданци се куќите. До Макпетрол бензинската е стигнато. Патот е затворен. pic.twitter.com/En2oLyW23v
— Ајс Ти (@IceBucks7) August 5, 2024
Директорот на ЦУК, Ангелов со утешителна изјава:
– „Не е загрозено ниту Богданци, ниту друго населено место од пожарот во овој регион. Но истиот предизвика вознемиреност кај населението“.
Ангелов потсети дека му се дало приоритет на овој пожар, биле испратени шест „ер трактори“, во текот на вчерашниот ден и хеликоптери. Тие помогнале, но, како што рече, за жал, не е воспоставена контрола. Ветрот кој дувал со 20 км/час не давал сигурност во навигацијата за воздушната акција во гаснењето со ер-трактори и хеликоптери.
На пожарот интервенирале професионални пожарникари од ТППЕ Гевгелија, Валандово, Струмица, Кавадарци, како и доброволците од ДППД „Дојран“.
Со Ангелов беше и командирот на доброволното противпожарно друштво од Валандово, Ѓорѓе Илиев. Тој рече дека на местото на пожарот постојано се слушаат детонации од неексплодирани убојни средства од Втората светска војна. Ангелов се согласија дека тоа е голем безбедносен проблем при гаснењето на пожарите.
На терен е и тим на ДЗС. Член на тимот за брз одговор за гаснење пожари изјави дека најзагрозено било на потегот кон бензинската и плинарата во Богданци.
Претходно денеска тука се дејствувало со неколку хеликоптери, но, како што рече Ангелов, поради силниот ветер и густиот чад морале да се повлечат.
