Панаѓурот во с.Ума, гевгелиско, во китното планинско село сместено на 820 метри надморска височина во пазувите на Кожуф планина секоја година привлекува многу следбеници на традицијата, и староседелци, и гевгеличани, и старо, и младо, и гости од соседните населени места.
Се прави заедничка селска сенародна забава, благословен празничен ручек во чест на заштитникот на селото Св.Пантелејмон, а домаќините подготвуваат „Влашка софра“ за да се потсетат сите гости на старите рецепти од домнина. Сукани пити, благи питулици, домашна алва, шербетлија баклава. Надорот во Ума ги правел од дамнина. Во аналите за селото е запишано дека овде во XIX живеело вашко население кое броело над 500 жители.
Подоцна економските прилики ги однеле новите потомци во потрага по работа, егзистенција, па таму каде што започнале да приходуваат формирале и семејство и не се вратиле во зеленилото и убавините на Ума. Ама ги влече селото, ги влече воздухот, природата негибната, зелена, се’ наоколу „вришти“ од природн убавина..
Такви поклоници на Уменската убост се и овие девојчиња, природата ги дарила со убавина, а семејството ги учи на столетните корени, на традицијата, на рецептите од баба, пра баба.
Поголемата Јана и помалата Мила се жителки на Гевгелија, ама го посетуваат селото Ума од каде потекнуваат семејните корени. Овде се главни церемонијал мајсторки за добредојде на сите поклоници на традицијата. Друштво им прави и ги насочува на правилата веќе дводецениската староседелка на Ума, Мирјана Дојранлиева.
– „Вака стамено стојте исправени, насмевнете се, завртете со рамињата и бедрата вака да заиграме оро, замавнете со ногата во такт на орото и секого поздравете го со добредојде“ – се поуките на Мирјана.
Може ли да одбиете колаче од овие момичиња-колачиња? Секако не можете. Ќе се вратите и ново да пробате и да ги пофалите за нивната спремност да се облечат во традиционалната народна носија која некогаш ја носеле жителките од Мегленско, стокмените жени влаинки.
Ете, толку од нас. Повеќе нека зборуваат фотографиите од убавиот ден панаѓурски во село Ума и традиционалната „Влашка софра“ за добредојде!
