Од 21 до 24 август годинава во Тиват, Црна Гора се одржува 4-от Интернационален детски фолклорен фестивал “Kolo bez granica” на кој учество зеде и Фолклорниот ансамбл „Мегдан“ од Богданци.
Тие денеска имаа официјален преим кај Градоначалникот на Тиват Жељко Комненовиќ, претставувајќи се од каде доаѓаат, каде е Богданци, од кога постојат како друштво и поделија подароци за спомен и сеќавање на задничкото пријатлство и соработка.
Играорците од „Мегдан“ синоќа настапија со свој концертен избор пред публиката во Тиват, на сцена на отворено и ги развиорија македонските ора, македонските песни. Пред почетокот на сценскиот настап, вчера на отварањето на фестивалот се одржа дефиле низ кејот на Тиват.
Македонските играорци после дефилето не издржаа мирни, заиграа оро со песна од нивните грла и ја запееја „Јовано, Јованке“.
На 4-от Интернационален детски фестивал на фолклорот „Оро без граници“ играорците од „Мегдан“ беа единствени претставници од Македонија. А, фестивалот го збогатија и настапите на фолкорните друштва од Хрватска, Романија и домаќинските фолклорни ансамбли од Црна Гора.
Аплаузите беа неизоставен дел од доживувањето на 50-члениот тим играорци од Богданци.
Домаќинскиот град Tиват е приморски град во југозападниот дел на Црна Гора, сместен во Которскиот Залив, со население од 14.000 жители. Инаку, Тиват е седиште на Општина Тиват која е најмала општина во Црна Гора по површина.
На почетокот од фестивалската програма тие го посетија Стариот Град во Котор кој е најдобро сочувана средновековна градба настаната во 12 и 14 век, па поради својата богата архитектура е заштитена од УНЕСКО.
За денеска, домаќините им приредија забава на сите деца-учесници на фестивалот, најпрво сите тимски учествуваа во креативните „игри без граници“, а потоа следуваше „пена парти“ и фрлање во водите на Јадранското море.
Се’ на се’ успешен настап и успешно претставување на македонскиот фолклор и нашите умни деца на детскиот интернационален фолклорен настан со ора, игри и претставување на вештините и во музиката, и во фолкорот, и во спортот.
Браво деца наши!
