И оваа учебна година како и минатата Општина Дојран ќе ги помогне младите семејства од општината кои имаат прваче во учебната 2024/25 година.
Во локалниот Општински Буџет обезбедени се финансиски средства за еднократна парична помош на семејствата за нивното прваче кое треба да го започне своето образование од септември годинава. Помошта изнесува 4.000 денари и ќе бидат исплатени на трансакциска сметка на родителот-барател.
– „Ја разбираме важноста да се обезбеди силна основа за образованието на нашите деца и оваа иницијатива е наш начин да ги поддржиме семејствата кои оваа година имаат првоодделенче. Децата се нашето најголемо богатство, тие се нашата надеж и нашата иднина“ – изјави Анго Ангов, градоначалник на оштина Дојран.
Оваа Одлука е поддржана од Советот на општина Дојран и предвидува:
„Секое семејство кое живее на територијата на Општина Дојран, со дете кое веќе уредно е запишано во ООУ „Кочо Рацин“ Нов Дојран, односно во некое од подрачните училишта во населените места од општината, има можност да добие еднократна исплата од 4.000 денари!
За да се искористи еднократната парична помош, родителите на првачињата треба да ги достават следните документи до општина Дојран:
🔹 Извод од матична книга на родените на детето;
🔹 Број на трансакциска сметка на родителот;
🔹 Копија од лична карта на еден од родителите;
🔹Потврда за запишан ученик во прво одделение во учебната 2024/25 година“.
Одлуката на општина Дојран е за поздравување дотолку повеќе што доаѓа почетокот на учебната година, а ССМ објави дека трошоците за живот се поскапени, а со тоа и теретот на родителите да ги опремат новите ученици за подготвен влез во светот на знаењето.
Минатата учебна година во општинското основно и подрачните училишта во Дојран имаше околу 50-на првачиња.
Општината на својата ВЕБ страница објави БАРАЊЕ – образец за апликација на доделување еднокртна парична помош за прваче – ЛИНК ОВДЕ
