Победничкиот пехар од одржаниот трет Интернационален Шаховски турнир во спомен на „Венци Попов“ за 2024 година му припадна на шахистот од Македонија Тони Лазов. Toj e 24 годишник од Неготино, член на Шаховскиот клуб „Алкалоид“.
Тој во конкуренција од 89 шахисти од Македонија, Србија и Грција, кои зедоа учество на турнирот имаше најдобар пласман и освоени 7,5 поени со одиграни партии во 9 кола, со што се закити и со пехар и парична награда од 20.000 денари што ја обезбеди организаторот.
Победникот Лазов е млад шахист роден 2000 година, а веќе има титула на Интернационален мајстор и меѓународен рејтинг од 2365. На шаховската табла се соочи со двајца шахисти од Србија и седуммина од Македонија.
Второто место на турнирот му припадна на Радовановиќ Никола од Србија кој освои 7 поени. Има 28 години и титула Интернационален мајстор со меѓународен рејтинг од 2441. На турнирот во Гевгелија се соочи со победникот Тони Лазов и беше победен од македонскиот шахист.
Третиот носител на пехар за освоено трето место му припадна на Панчевски Филип од Македонија со севкупно освоени 7 бода на турнирот. Филип е 36 годишен Интернационален мајстор со меѓународен рејтинг 2388.
На листата на наградени следуваат: Златановиќ Борољуб Интернационален мајстор од Србија кој го освои 4-то место, Станковиќ Милош (ИМ од SRB) 5-то место, а од 6то до 10 место се пласираа македонските шахисти Стојаноски Звонко (ГМ), Николовски Никола (ИМ), Кралевски Александар (Фиде мајстор), Вељаноски Андреј (ФМ) и Андонов Тодор.
Од гевгелиските шахисти најдобар пласман постигна Танчев Борче со освоени 5,5 поени. Тој се пласираше на 27-мото место на меморијалниот турнир.
Најдобра шахистка на турнирот е прогласена Зорица Ташева (64 годишна) за чиј успех организаторот обезбеди симболична парична награда. Таа се пласираше на 77 место со освоени 3 (три) поени.
За најдобар млад играч на турнирот беше прогласен Маринидис Ставрос, 13 годишен шахист од Грција. Тој го завзеде 11-то место на турнирот со освоени 6 поени.
Судиското трио кое што се грижеше за регуларноста на натпреварите го сочинуваа: Кироски Тони интернационален мајстор, Николоски Кире (ФА) и Органџиев Оливер (ФА).
Организатор на Третиот шаховски меморијал кој веќе прерасна во тардиционален е семејството Попови во соработка со ШК „7 Ноември“ Гевгелија. Претседатеот Пепи Танчев изрази задоволство од одзивот на шахистите и интернационалните мајстори од земјата и соседството да учествуваат на традиционалниот шаховски меморијал во Гевгелија.
Гевгелиската инспирација за шаховски меморијал во Гевгелија Венци Попов (1962-2013) во август навршува 11 години како се раздели од шахот и овоземниот живот. Беше најмладиот шаховски првак на Гевгелија, трократен шаховски првак на Македонија, член на Југословенската шаховска репрезентација која го дала Гевгелија и со своите шаховски подеми и освоена титула Фиде мајстор стана добитник на највисоката Општинска награда „7 Ноември“ за достигнувањата во областа на спортот и успешна спортска презентација на Гевгелија.
Гевгелија го памети по успесите, а шахистите го паметат и споменуваат Венци со учество на Меморијалот во негово име.
