Шестгодишниот Димитар Трајков е гевгелиска музичка ѕвезда во подем.
Има само 6 години, а веќе реди концерти како искусен ученик при Школата за тапани под менторство на Момчило Делев, која работи веќе две години како програмска секција во рамките на Домот на културата „Македонија“ во Гевгелија.
Димитар вчера имаше двојна инспирација за настап: прво, тоа што во понеделникот стана прваче во ООУ “Крсте Мисирков” и второ, тоа што повторно настапува јавно со својот омилен инструмент, тапанот.
Видеото е од вчерашниот настап на Димитар заедно со 12те ученици од школата за тапани, пред платото на Народниот театар во Гевгелија.
Негов избор за да ја воодушеви публиката овој пат е „Smells like teen spirit“ од Нирвана.
Димитар пред една година го имаше првиот настап пред гевгеличани и беше дочекан со овации. Тогаш имаше 5 годинки и само неколку месеци тренинг со тапаните во рамки на школата за тапани во Гевгелија.
Чукаше тапани на нумерата „Chop suey!“ од „System of a Down“. Погледнете и уверете се:
Новото музичко откритие публиката го слушна и на манифестацијата „Вкуси го југот“ во септември минатата година во Гевгелија.
Димитар Трајков од Гевгелија, ученик во Школата за тапани е мало детенце кое избира жестоки рок нумери за да ја изрази својата пасија кон тапаните и музицирањето. Ќе ве изненади неговата сила да го совлада и да го натера тапанот да звучи моќно со неговите ударалки кои точно по так ги упатува на тапаните, чинелите. Како знае ова мало детенце да се поврзе со нотите и од жестокиот рок ритам да го издвои тактот на тапаните кои ја даваат моќната нота во песните? Секако, учи, па знае и настапува!
На манифестацијата „Изворник“ во декември 2023, со своите 5 години и саканиот инструмент – тапаните, Димитар со својата изведба „Drum cover – GNR-Paradise city“ предизвика овации кај публиката. Погледнете и слушнете.
И, сега, верувате ли дека „ѕвездата е родена“!?
СРЕЌНО на училиште Димитар, учи и напредувај и имај успешни настапи со твоите омилени тапани!
