Теодора Бацева има 7 години (за една недела ќе го одбележи 8от роденден) и е ученичка во III одделение. Љубопитството на своето детство освен во игрите, песните и рецитациите како дете, го искажува и со интересот да чука на тапани. Веќе една година ја посетува школата за тапани во Гевгелија под менторство на Момчило Делев.
На неодамна одржаниот фестивал „Вкуси го југот“ што се одржа три дена за време на викендот во Гевгелија Теодора настапи со своја изведба на тапаните и освои најмногу аплаузи, лајкови и прегледи на социјалните мрежи.
Со сигурен чекор се качи на сцената, го завзеде местото зад тапаните, и без комплекс дека е помала од нив затропа со сета сила и мерак. Еве слушнете ја нејзината изведба на песната „Sunshine of your love“ од групата „Cream“ од 1967 година.
Од каде таков жар за тапани кај малата Теодора?
Старите велат „Kрушата под круша паѓа“! Теодора веројатно го носи генот на својот прадедо Пене кој обожаваше да свири тарамбука (ударен инструмент), односно на својот дедо Гроздан (Данчо) Дојранлиев кој чукаше на тапани. Па и третата генерација од потомството искажало симпатии да чука тапани, а аплаузите од публиката на фестивалот „Вкуси го југот“ покажаа дека не згрешила во својата музичка определба.
Теодора настапи и на групниот концерт на школата за тапани пред платото на Народниот театар во Гевгелија во септември годинава. Ова е нејзината изведба на нумерата „Seven Nation Army“ од „White Stripes“ на тој концерт.
Гевгелиската школа за тапани ја посетуваат 12 ученика од кои шест се женски, од нив три се ученички, Елена, Теодора и Ана. Останатите три се поголеми, едната е студентка, другата г-ѓа мама, а третата медицинска сестра. Сите со возбуда го учат овој инструмент и чукаат тапани.
Еве ги на заедничка фотографија позираат после настапот на сцената на гевгелискиот фестивал на храна, вино и многу забава.
Теодора вежба освен во школата за тапани и на своите тапани дома, зошто генот си е ген, талентот е талент, но вежбањето мора да се одвива постојано за да се унапредув знаењето, способноста и вештината.
Честитки за новата гевгелиска џезерка која ја запозна гевгелиската публика.
Среќно во учењето и настапите на сите тапанџии од школата за тапани во Гевгелија.
