Точкаџиите од Гевгелија годинава ја организираат втората велосипедска рута „Сите уф Серменин“. Учесниците на настанот се велосипедисти, организирани од „Гевгелија точак клуб“ и целиот настан ќе започне од старото училиште во селото.
За таа цел староседелците и имателите на викенд куќи во ова планинско село со денови се подготвуваат да го дотерат селото, да се претстават како вистински домаќини.
Се коси тревата крај селскиот пат, се чистат патеките, ледините каде ќе престојуваат велосипедистите, се чисти просторот околу старото училиште во селото, околу и во селската црква… Посетителите очекуваат да видат село сместено во природна убавина, а селаните и сезонските жители на селото се потрудија таа убавина да дојде до израз.
Еве фото доказ за акциите на тамошните жители. Сите добија задача на заедничкиот состанок на месниот одбор и црковниот одбор на селото да направат тоа да биде привлечно и посетено и од други љубители на природата.
Инаку, за публиката која што ќе сака да го следи настанот, ќе потсетиме дека ќе се вози велосипедска рута која започнува од старото селско училиште и завршува на истото место после извозени 40 километри и совладана висинска разлика од 1.200 метри, а трасата поминува после училиштето кон манастирот „Свети Илија“, понатаму кон викенд населбата Коњаре, па кон Висока чешма, од каде се прави целосно кружно свртување и велосипедистите се движат повторно кон с.Серменин каде завршува 40 км рута.
Долж патеката велосипедистите ќе бидат „пречекани“ од повеќе чешми со чиста планинска вода.
Патеката е од средно-тежок карактер 8/10.
Изморените велосипедисти серменчани ќе ги дочекаат повторно, на честитки, поздрав и закрепнување со пригодна домашна софра.
Фото: И.Ивановска (с.Серменин)
