Членовите на ЗПСК „Кожуф“, и годинава го организираа традиционалниот јубилеен 20-ти Меморијал “Димитар Кангов – Кангата” 2024. Меморијалниот марш се одржа со искачување на највисокиот врв на Кожуф, врвот Зелен Брег, висок 2.166 м. во чест на долгогодишен член на овој планинарски клуб, Димитар Кангов – Кангата, кој пред повеќе од 20 години го остави својот живот на Кожуф планина при обид за искачување на врвот Ѕена од грчка страна.
На меморијалот учествуваа 110 планинари, љубители на природата, ученици од основнoто училишта „Климент Охридски“ од Миравци и членови на планинарски спортски клубови од државата ПСК „Двете уши“, ПСК „Даб“ Дојран, „Ентузијаст“ Струмица, „Фри хајкерс“ Неготино, СПД „Пробиштип“ од Пробиштип и планинари од Прилеп.
Наместо помен планинарите со цвеќе и наклон ги споделија спомените за својот планинарски колега пред неговата спомен плоча поставена на неколку метри под врвот Зелен брег, местото каде Димитар на 500 метри до врвот од грчка страна испушти последен здив и се спои со вечноста. Беше чаршијски човек, градски лик, адвокат, познат со сите и отворен за совет за сите. Канцеларијата му беше во Старата градска чаршија во Гевгелија и оттука неговата ширина кон луѓето, еснафите околу него и широкиот прием за секој кој ќе му влезеше во канцеларија и побара совет, правен, животен.
Пред шест години овој Меморијал освен во традиционалниот дневник на активности на гевгелиското планинарско друштво „Кожуф“ ставен е и во календарот на акции на ФПСМ (Федерација на Планинарски Спортови на Македонија ).
Кожуф е планина која се наоѓа на границата помеѓу Македонија и Грција, највисок врв на Кожуф е врвот Зелен Брег со своите 2.166 метри.
Развиорените клубски знамиња на планинарите се доказ за почит и другарски поздрав до човекот кој ги сакаше планините и природата и се спои со нив, пред 20 години, во незаборав.
Организаторот на Меморијалот, овде на врвот додели Благодарници на сите друштва и училишта кои учествуваа на овој јубилеен спортски настан. Меѓу нив беа и Јован Мандалов, најмалиот учесник на 6 годишна возраст, инаку член на ЗПСК „Кожуф“ и Танка Гаврилова највозрасната учесничка на Меморијалот, членка на ПСК„Двете уши“, која во својата зрело доба и понатаму е активен планинар.
