Гевгелија и Негорските бањи втора година по ред ќе бидат домаќини на „Панкс Бекјард Ултра“ – најуникатната атлетска трка во Македонија.
Минатогодишната трка ги надмина очекувањата на организаторот, бидејќи беше извонредно прифатена од сите учесници на голема радост, не само за организаторот, туку и од спортистите и секако публиката која го следеше спортскиот настан.
„Punk’s Backyard Ultra“ е иновативната и предизвикувачка ултра маратонска трка, сместена во прекрасната природа околу Негорци на југот од Македонија. Трката е уникатна по својот формат, кој бара од учесниците да ја завршат патеката долга 6,7 километри во временскиот период од еден час, но трчајќи повторно и повторно следен круг се додека не остане само еден учесник, кој ќе се смета за победник на трката со истрчани најголем број на кругови.
За годинашниот втор УЛТРА настан пријавени се 70тина натпреварувачи од 5 држави, а очекувањата се дека неколкумина од нив ќе истрчаат најмалку 24 круга односно 24 часа и околу 170 километри.
Ова е атлетска трка на издржливост, сила и воља и на истата почестите ги добиваат максимално подготвените спортисти кои секој атом од својата сила сакаат да ја потрошат на спортските патеки за да и4 самите го дознаат својот спортски врв.
Второто издание е закажано за време на викендот 19-20 Октомври 2024 со официјален старт во сабота во 14 часот и е во организација на здружението „ТРЕКС“ од Скопје, докажан организатор на најпопуларните планински трки во Македонија, а несебично помогнати од АК „7ми Ноември“ – Гевгелија, за спортскиот настан утре во Негорци, гевгелиско.
Значајна новина оваа година, „Punk’s Backyard Ultra“ ќе биде домаќин на Националното првенство во ултрамаратонски трки во бекјард како дел од Светското првенство. Секоја држава одбира репрезентација од 15 луѓе кои ќе трчаат на бекјард организиран во својата земја, како дел од светското сателитско првенство кое ќе се одржува истовремено во 64 земји од светот. Ова е прекрасна можност за сите македонски ултрамаратонци да се натпреваруваат на домашен терен и да ја претстават Македонија преку својата издржливост, сила и волја.
Организаторот на трката ги повикува сите љубители на спортот да дојдат во Негорски бањи и да се придружат во бодрење на натпреварувачите.
Организацијата на „Punk’s Backyard Ultra“ воедно ги известува возачите на моторни возила и ги замолува за особена внимателност и почитување на поставената сообраќајна сигнализација на регионалниот пат Р1102 помеѓу Негорци и Мрзенци кај (јужната) раскрсница за влез и излез во Негорските бањи поради тоа што учесниците на натпреварот ќе вршат преминување на патот на тоа место.
Викендот љубителите на спортско-рекреативни настани можат да се придружат и ги следат најдобрите атлетски сили од Гевгелија, од земјава и меѓународни тркачи и да се придружат на спортската еуфорија која Гевгелија и Негорските бањи ја доживуваат по втор пат, па редно е да посакаме ова да биде и традиционален спортски настан кај нас, на Југот од Македонија.
