Ведар и позитивен, со лесно темпо на движење, со тркачка маица од „November Run Gevgelija“ таков го затекнавме на патеката кај Негорските Бањи Саво Спасеновски, највозрасниот натпреварувач на трката „Панкс Бекјард Ултра“, што се одржа викендов во Гевгелија.
Саво истрча три круга во должина од 6,7 километри, делница определена за 1 час трчање, а тој ги „пролета“ 20,11 километри севкупна должина за 2 часа и 55 минути.
Роден е 1955 година, има 69 години и немаше конкуренција во својата возраст на овој ултра маратон. Тој си е победник на генерацијата која не дозволува годините да ја спречат во активно рекреирање, па и спортување на републички и меѓународoни спортски настани.
- „Секогаш си велам: Ако можам јас, може и некој друг да трча и спортува, не за популарност туку за своето здравје“ – ни’ ја откри Саво својата мотивација да се натпреварува на маратонски трки.
Започнал со активно трчање на регуларни спортски настани од 2017 година, а пред тоа рекреативно. Со трчање започнал после наодот дека има холестерол во крвта. И, наместо диети и апчиња, тој се определил за спортување. Учествувал на официјални натпреварувања на долги маратонски стази: Скопскиот полумаратон, на Софијскиот полумаратон, на маратонот на Матка, на Пелистер, на Галичица, учествуваше и на гевгелиските 7-мо ноемвриски трки „November Run Gevgelija 2023“ каде на трасата од 10 километри постави свој личен рекорд.
- „Од дете сакав да трчам, особено го сакав фудбалот. Но, периодот на образование, професионалните обврски ме оддалечија од желбата да продолжам со фудбалот. Продолжив со рекреативно трчање но, дури пред 7 години започнав активно учество на регуларни трки што се организираат кај нас и во соседството“ – додаде нашиот соговорник.
Саво Спасеновски по професија е компјутерски програмер. Цел живот го поминал во Скопје, а по пензионирањето живее во Гевгелија на наследениот имот од своето семејство кое има гевгелиски корени по неговата мајка. Овде станал член на ШК „7 Ноември“ Гевгелија зошто бил актиен шахист во текот на животот, со ранг „фиде“ и 4-то пласиран на ниво на сениорско првенство 1977, на РСМ.
Активно учествува и во акциите на ЗПСК „Кожуф“ од Гевгелија.
Саво Спасеновски, роден 1955 година, трчаше во Гевгелија под реден број 55, на Ултра-трката беа пријавени 55 учесници, тој истрча 55-ти со време од 2:55 часа. Не можеше да се спаси од двете 5-ки кои го следеа на спортскиот настан во Гевгелија.
Можеби е знак дека му е пријатно во Гевгелија, овде му погодува климата, луѓето, роднините, спортските другарства кои ги стекнува, па и резултатите кои се отсликуваат и во неговото витално здравје иако се приближува на седмата декада од животот.
- „Целта ми е ако можам да инспирирам и други да трчаат во корист на своето здравје. Ако можам јас, можат и други. Ако мене трчањето ми го подобрило здравјето, може да им се подобри и на други. Нема штета во спортувањето и рекреативното трчање. Само здравје и спортски дружења“ – порача Саво на крајот од нашиот разговор за GevgelijaNet.
Па, еве мотив до нерешителните рекреативци, да се пријавите за учество на 7мо ноемвриските трки во чест на ослободувањето на Гевгелија и да ја осетите атмосферата на натпреварувањата и здравиот срцев ритам во вашето тело.
Ј.Д.
