Ова е името на тортата која освои ПРВО место на “Тортијада 2024” што се одржа викендов во Струмица.
Симболична торта со црвено срце на дланка ја изработија членките на “Мобилаост” Гевгелија – Благица Ѓоргиевска и Валерија Пеева.
Ова е трета година по ред како тимот на “Мобилност” Гевгелија ја освојува првата награда на тортијадите на кои учествуваат лица со инвалидитет.
Настанот беше во организација на “Мобилност Струмица” а под покровителство на Националниот сојуз на лица со телесен инвалидитет на Македонија “Мобилност Македонија”.
– “Вредните раце на Благица и Валерија докажуваат дека телесниот инвалидитет не е пречка за да се оствари успех кога нешто се работи со љубов” велат од гевгелиска “Мобилност”.
Честитки за трократните првакињи од “Мобилност” Гевгелија!
Тортата насловена „Срце на дланка – Надеж“ направена од жени на Здружението „Мобилност“ од Гевгелија е најдобрата торта претставена на синоќешната 25-та Манифестација „Тортијада 2024“ што се одржа во хотелот „Вила Парк“ во Струмица.
Жири комисијата составена од Николина Георгиева и Илинка Тодорова, едни од најискусните струмичанки во подготвување на слатки производи, втората награда и ја доделија на тортата подготвена од Здружението „Мобилност“ од Кочани, додека третата награда за тортата на Здружението „Мобилност“ од Велес.
Девет торти беа подготвени за манифестација што се одржа во неделата во хотел „Вила Парк“ подготвени од домаќинки членови на здруженијата „Мобилност“ од Скопје, Куманово, Велес, Прилеп, Кочани, Штип, Радовиш, Гевгелија и домаќините Струмица.
Претседателот на Советот на општина Струмица, Марјан Даскаловски отворајќи ја манифестацијата кажа дека овој 25-годишен опстој е вреден за почит и внимание, а организаторите, Здружението „Мобилност“ од Струмица ја заслужуваат најголемата почит.
- „Убеден сум дека по 25-ти пат оваа „Тортијада“ ќе го оправда својот „рејтинг“, стекнат во овој четвртина век, а сите учесници, без разлика од кој дел на Македонија доаѓаат, ќе докажат по којзнае кој пат дека инвалидноста воопшто не претставува пречка да се покаже инвентивноста, креативноста и мајсторството во правењето убави торти. Така било, така е, така и ќе остане и во иднина, но најважно е да се остваруваат главните цели на манифестацијата, а тоа се, успешното негување на културно-забавниот живот на лицата со телесен инвалидитет, како и подигнувањето на јавната свест кај граѓаните во врска со потребите на овие лица и нивна инклузивност во сите сегменти на општеството“ – кажа Даскаловски.
