НИЕ СЕ ВТЕМЕЛИВМЕ, ВИЕ ГРАДЕТЕ!
Oва е заветната порака испишана на споменикот на паднатите борци од НОБ поставен во центарот на Нов Дојран.
Денеска, со полагање на свежо цвеќе пред спомен обележјето на паднатите борци за време на Народноослободителната борба против фашистичкиот окупатор започнаа одбележувањата на 80 годишнината од ослободувањето на Дојран, на денешниот победоносен ден, 5 ноември 1944 година.
На одбележувањата присуствуваа бројни граѓани, ученици, фолклористи, рецитатори, претставници од локалната самоуправа сите со благодарност за делата на борците партизани, загинаите во НОБ, за нивната младешка храброст, истрајност и човечност која ја покажале тогаш кога било најпотребно.
Учениците од ООУ “Кочо Рацин”-Нов Дојран трчаа крос во чест на празникот, а подоцна најбрзите од учесниците беа и наградени. Награда за особен успех и промоција на Дојран доби ученичката Јана Бошнакова за освоено трето место на државен натпревар по предметот Природни науки.
Во истиот дух, плакети и благодарници за особен придонес, промоција и поддршка на Дојран добија Н.Е Грегор Прескер, Амбасадор на Р. Словенија во Р. С. Македонија, Доброволното противпожарно друштво – “Дојран”, Фудбалскиот Клуб “Дојранско Езеро”- младински категории и Фолклорниот ансамбл “Мегдан”.
Младите фолклористи од Дојран, освен добиената Благодарница за особен придонес во промоцијата на Дојран настапија пред своите сограѓани на свеченостите по повод Денот на општината – 80 години од ослободувањето на Дојран.
Прославата беше надополнета со прекрасниот глас и изведба на почитуваната дојранска граѓанска, пензионерка, но неуморен естраден промотор на македонската песна и убавините на Дојран, госпоѓата Добрила Чабриќ.
Честит и вековит 5ти Ноември – денот на ослободувањето на Општина Дојран!
