Зелена енергија од сончеви панели ќе се произведува за Психијатриска болница Негорци.
Овој проект е усвоен од Управниот одбор на болницата, а денеска беше потпишан Договор за набавка и монтажа на панели за фотонапонска енергија за потребите на Психијатриска болница.
Инвестицијата вредна 2.698.976 денари е сопствен влог на болницата.
Се очекува со ставањето во функција на фотонапонските панели болницата сама да произведува електрична енергија за своите потреби, а трошоците за енергија да ги намали за 60%. Со тоа Психијатриската болница во Негорци, Гевгелија ќе биде прва јавна здравствена установа во државата со ваков економско-енергетски инсталиран систем.
За карактеристиките на новиот проект за GevgelijaNet изјава дадоа Сашо Стојиловски, директор на ЈЗУ Психијатриска болница Негорци, Гевгелија и Илија Стафилов, директор на фирмата изведувач ДПТУ “Стафилов Солар” ДООЕЛ од Кавадарци.
Се работи за набавка на 100KW фотонапонска централа со панели од 405 V или вкупно 250 панели. Во рамки на набавката се предвидени и 4 инвертори од по 25 KW.
– „Претходно беше спроведена постапка за јавна набавка на која беа поднесени вкупно 2 понуди. Критериум за избор беше цената 70 поени и квалитетот 30 поени. Во однос на квалитетот, се изврши бодување на гарантниот рок кој го понудија понудувачите и тоа:
– Гаранција на изведба
– Гаранција на инвертер
– Гаранција на панели
Носителот на набавката Стафилов Солар Дооел Кавадарци имаше понудено пониска цена од вториот понудувач, за што доби максимален број бодови, а истот така имаше понудено и подолг период на гаранција, односно имаше понудено 10 години како гаранција на изведба, 10 години како гаранција на инвертер и 30 години гаранција на панели за што доби исто така максимален број бодови“, изјави за GevgelijaNet директорот Стојиловски.
Рокот на изведба на работата е 10 дена од денот на воведување во градба.
Во разговор со директорот на ЈЗУ Психијатриска болница-Негорци, Гевгелија бевме информирани дека се планира во иднина да се набави и батерии кои ќе вршат акумулација на вишокот на електрична енергија со цел да се обезбеди што поголема енергетска независност на институцијата.
Во однос на исплатливоста на овој проект, по направени анализи од страна на инвеститорот, се очекува најмногу до две години да биде исплатена инвестицијата, односно инестираните средства да бидат повратени, а во иднина да се почувствува и бенефитот од самата инвестициија.
