Прво место на турнирот освои Дејан Атанасовски, второто место му припадна на Никола Пеев, а третото место со својата игра го освои Никола Марачков.
Турнирот во табла се одржа во пресрет на 3-ти декември, Меѓународниот ден на лицата со инвалидитет. Истиот има меморијален карактер поветен на Марко Лазаров, истакнат член на „Мобилност Гевгелија“ и редовен учесник на спортските натпревари како и турнирот во табла што го организира „Мобилност“ Македонија. Лазаров замина од овој свет годинава и во негов спомен неговите колеги од Здружението на инвалиди го именуваа турнирот “Марко Лазаров”, а е во организација на Здружението за спорт и рекреација на инвалиди Гевгелија.
Гостин на турнирот беше Ванчо Каранфилов, победникот на републичкиот турнир во табла што се одржа годинава во Тетово. Тој беше долгогодишен личен и спортски пријател со именосецот на турнирот. Каранфилов е спортист со инвалидитет кој има значајни успеси зад него, најзначаен е параолимписки сребрен медал на параолимписки игри во Атина 2004 во Стрелаштво.
На овогодинешниот Републички натпревар во табла за лица со телесен инвалидитет што се одржа во Тетово на крајот од октомври Ванчо Каранфилов освои прво место, а наградата ја посвети на починатиот пријател Марко Лазаров. Својот освоен пехар за ПРВО место му го предаде постхумно на неговиот син Лазе.
Марко Лазаров од Богородица роден 1954 беше член на Мобилност Гевгелија, а претседател беше на Здружението за Спорт и Рекреација на Инвалиди од самото основање во 2009 г. до почетокот на 2024г. Почина оваа година во Август по кратко боледување. Во негова чест прв пат се одржа овој турнир во организација на Здружението за Спорт и Рекреација на Инвалиди Гевгелија.
– „Здружението за Спорт и Рекреација на Инвалиди Гевгелија формирано 2009 година со цел да се поттикнат лицата со инвалидитет да спортуваат, да се насочат да го спортуваат спортот во кој се пронаоѓаат, да организира натпревари и тренинзи. Покрај лицата со телесен инвалидитет кои се членови на Мобилност Гевгелија, во ова здружение за спорт се вклучени и глувите лица и слепите лица од нивните здруженија. Втор Претседал на ЗСРИ Гевгелија е Никола Пеев чиј мандат почна годинава.
Турнирот во табла се организира прв пат годинава и се надеваме дека ќе стане традиционален“ – изјави за GevgelijaNet претседателката на гевгелиска „Мобилност“ Даниела Гошева Кангов.
Честитки за победниците на турнирот и им посакуваме уште спортувања, уште дружења и сеќавања за своите членови!
