Фолклорниот ансамбл „Бојмија“ од Гевгелија во неделата одржа голем генерациски концерт посветен на нивниот јубилеј 20 години од формирањето на Ансамблот.
Активното негување и презентирање на македонскиот фолклор, музичките изведби на ора и песни со народни инструменти, стамените и разиграни концерти низ дводецениското постоење на фолклорниот ансамбл „Бојмија“ ја збогатуваат културната понуда на Гевгелија, а исто и несебично ја презентираат со учество на меѓународни фолклорни фестивали.
Гевгелиската публика уживаше во настапот со ора од познатите кореографски изведби што ги играат генерациските следбеници и поранешни активни членови на „Бојмија“. Не ги заборавиле чекорите, тактот, и со својата експресија ја понесоа и публиката на фолклорно патување низ Македонија и Гевгелија.
Еве дел од изведбите на разиграните играорци:
Koj ќе ги затреси штиците кои значат живот (сцената), ако не момчињата со своето брзо, снажно, сигурно оро и ударот од брзите стапки иако со меки опинци на сценскиот подиум. Таа енергија ја осети и публиката во големата сала на Народниот театар и на играорците им испрати громогласен аплауз.
На оро сред село младите некогаш се среќавале, се бендисувале, со оро се закажувала веридба, со оро се започнува свадбена веселба, орото е синоним за веселба и начин на сеопшто славење кај нас во Македонија. Вака стројно, со оро за заљубување играа и членовите на „Бојмија“ на својот концерт.
Радоста од концертниот настап трае и после концертот, зошто „бојмијци“ иако срцата ги оставија на сцената со својата игра, душата уште им се радува од изнесеното на сцена од нивна страна, од приемот на публиката и заслужените аплаузи како награда. Друга награда нема, А, и милината во душата која ќе ги грее со денови, и тоа е награда која самите ја заслужиле.
Честит јубилеј, да ви се множат настапите, успесите, радостите!
