Годината што изминува, наместо радости за празниците кои следат во последните свои денови носи и загуби на наши познати гевгеличани.
Минатата недела Гевгелија се прости и се збогува од Ристо Нејков, познат градски лик, спортист, спортски ветеран.
Ристо Нејков, е роден во Гевгелија на 07.09.1937 година, почина на своја 87 годишна возраст, минатата недела на 16.12.2024. година. Погребот се изврши во кругот на семејството и пријателите, на градските гробишта во Гевгелија.
Гевгеличани Нејков го знаат како неуморен спортист. Ристо од мали нозе беше фокусиран на спортот и се’ поврзано со „топката“, но сепак обрнал внимание и на образованието.
Како дете од повоената генерација, растејќи во време кога било неопходна обнова на воено разрушената земја, тогаш во рамките на СФРЈ, Ристо се запишал на земјоделско училиште, посветен земјата да се обработува, а граѓаните на слободната држава да можат да се хранат од своите плодови, од својата татковина.
Завршил виша земјоделска школа, но напоредно спортувал и настапувал во дресот на гевгелискиот ракометен клуб „Партизан“. Посветен на својата работа и кариера во многу подрачја, работниот век го завршува во „Стопанска банка“ – филијала Гевгелија, на работна позиција „девизен менувач“.
Како младинец Ристо Нејков станува член на првата екипа на РК „Партизан“ – Гевгелија и запишан е во аналите на овој клубски ракометен првенец во Гевгелија. По завршувањето на кариерата како активен спортист продолжува во сферата на спортот како државен ракометен судија во рамките на СФРЈ. Добитник е на многу признанија, награди и медаљи од областа на ракометниот спорт.
Неговиот 87 годишен животен век беше исполнет со среќни и успешни моменти, а најбитно од се’ опкружен од фамилијата – најголемата негова гордост.
Денеска, на ден 24.12.2024, се одржа 9 дневен помен за неговата душа.
Нека почива во мир.
Вечен спомен за севкупниот негов спортски и професионален придонес за спортот и економијата во Гевгелија.
