Гевгелиското танцово студио „Mystic Dance“ учествуваше на престижниот меѓународен танцов натпревар „Balkan Dance Unity“ организиран од екстрем денс студио од Ниш и овде во силна конкуренција од 1148 натпреварувачи успеа да освои ТРИ ПРВИ места во категориите во кои настапија девојките од југот.
На натпреварот во модерни танци „Balkan Dance Unity“ во Ниш учествуваа следните три групи:
– Јуниори хипхоп формација
– Сениори стрит шоу група
– Сениори 2 стрит шоу формација
Сите освоија ПРВО МЕСТО во својата категорија.
Особено внимание и позитивни реакции од судиите и публиката предизвика настапот на „Сениори 2“ (возраст над 30 години). Се работи за група составена од ентузијасти, членови на денс фитнес програмата на Мистик која опстојува веќе 10 години.
– „Програмата по денс фитнес се состои од тренинг кој користи чекори и движења од различни стилови, првенствено латино и урбани танци. За оваа пригода составивме триминутна кореографија на основа на урбани танци како би се вклопиле во категоријата стрит денс шоу. Групата беше високо мотивирана за овој проект и резултатот дојде последователно на секојдневните интензивни подготовки“ – изјави менторот и кореограф на танцовото студио „Мистик“ Александар Аврамов, за GevgelijaNet.
Според официјалната статистика на организаторот, на натпреварот учествуваа 704 натпреварувачи од Србија и 444 натпреварувсчи од Македонија. Натпреварот го судеа 14 судии, вклучувајќи го и гевгелискиот фитнес и танцов тренер на нашите девојки победнички, Александар Аврамов.
Натпреварот се одржа во саботата, на 28 декември 2024 година, со Гала шоу, организиран во салата „Мика Антиќ“ во Ниш. Истиот е традиционален и меѓународен со присуство на танцови групи од Србија, Македонија и соседните земји. Секоја награда значи доказ за трудот и престиж на меѓународната сцена и на нашите девојчиња од југот.
Голем успех за „Мистик денс“, потврда за веќе понесените награди од претходни натпреварувања годинава и голем успех за девојките сениорки 2 кои успеаја да го воодушеват стручното жири и со својот настап да освојат Прво место. Прв јавен настап, прво меѓународно претставување и веднаш започнуваат со освојување на ПРВОТО место. БРАВО!
Браво за сите девојки од „Mystic Dance“ и честитки за заедничкиот успех!
