Остварен сон – отворена самостојна изложба на уметницата Иванка Ивановска на нејзиниот 80-ти роденден по повод 25 години самостојна уметничка дејност.
Иванка нашите читатели ја запознаа од интервјуто во септември кога ја откривме уметницата која четири месеци во годината живее и твори во планинското село Серменин, на Кожуф планина и овде од природата и опкружувањето, од селскиот амбиент на едно време, ја црпи целта инспирација за нејзиниот уметнички израз.
Во својот творечки опус веќе четврт век беше верна на својата уметничка пасија, чувајќи ги делата за себе и подарувајќи ги само на блиски луѓе од своето секојдневие, од серменинското маало, без да посака да продаде нешто од нејзините платна, ниту со определба така да стекне средства за да направи своја самостојна изложба.
Знаејќи го нејзиното кредо, да работи, а не да изложува, да поклонува свои дела, а не да продава, на патот кон заборавот и’ се испречија нејзините деца, снаи, внуци: Борјан, Матеа, Стефан, Тања, Македонка и Влатко кои ја организираа и подготвија Првата самостојна изложба на нивната сакана, мајка, свекрва, баба Иванка Ивановска.
Изложбата се одржа од 14 до 21 јануари во кафетеријата „Концепт 37“ во Скопје каде на ѕидовите на угостителскиот објект беа изложени делата на Иванка. Овде скопјани и гостите една недела се дружеа на кафе средби со пријателите и уметноста на уметницата од Серменин.
Иванка Ивановска, родена во село Серменин 1945 година, исселена 1952, а повторно му се враќа 2009 година каде гради куќа на татковото земјиште кое било нива со лозје.
– „Доаѓањето во Серменин за мене беше враќање кон моите корени, зошто Серменин е местото каде се родив, местото на мојата мајка, а Скопје каде што живеев и работев 35 години е моја маќеа. Овде времето го исполнувам со сликање. Имам свое работно атеље и преку 100 создадени дела. Инспирација ми е околината, селото, овдешните жители, старите селски куќи, цвеќињата кои ги собирам по полето, камењата, реката која секој ден ја слушам како жубори. Ова е богатство од живот кое ме крева да станам, да живеам, да творам, да создадам нешто кое многу радо го подарувам на луѓето со кои се дружам, или на дојденци во селото со кои се запознавам“.
Изложбата како уметнички настан беше збогатена и со роденденска забава на уметницата Иванка која на денот на отварањето на изложбата 14 јануари полнеше 80 години. По тој повод и’ беше подарена торта на која имаше поставен штафелај, со посвета за целиот нејзин креативен опус и да продолжи да твори за свое задоволство и на задоволство на публиката која конечно ја откри и се запозна со нејзината уметност: старите серменински куќи, „Девојката со душа“, природата во серменинското опкружување…
Иванка вели дека била пресреќна од настанот, од изнанадувањето од своите мили и по завршувањето на изложбата повторно ги спакувала своите дела, останувајќи и понатаму со определбата на Ван Гог, се’ да сочува без да продаде ниту едно свое дело.
За спомен и сеќавање на нејзината прва изложба и уметничка промоција пред публиката ќе и’ остане Каталогот од изложбата во кои се содржани 30-на нејзини дела, со наслов, колоритот и опис за уметничкиот.
„Никогаш не е доцна“ да се промовира квалитетот и тоа што го имате, умеете, го создавате, па ни 80-те години живот не ја спречија Иванка да се радува на единственото на кое уметниците најмногу се радуваат, а тоа е своја самостојна уметничка изложба.
Па, годинава и посакуваме полно инспиративна работа, насликани платна, и нова изложба за следниот роденден!
Честитки Иванка!
Ве потсетуваме на нејзиното интервју дадено за GevgelijaNet.com
