Младата 16 годишна Ружица Кирова, ракометарка на ЖРК „Гевгелија“ избра својата спортска кариера да ја продолжи во РК „Делчево“ од Делчево.
Таа настапува на бековската позиција и овде ќе да игра со реден број 29. Зад себе има едноиполгодишно искуство со тимот на ЖРК „Гевгелија“, кој престана да се натпреварува во Женската ракометна лига поради одлука на Ракометната Федерација на Македонија да го исклучи клубот од натпревари.
Но ете, квалитетот не може да седи дома, ракометиот порив во младата ракометарка Ружица бара ново истакнување, нови искуства, тимска работа и победи на теренот.
Ружица е ученичка во СОУ „Јосиф Јосифовски“ Гевгелија и е втора година на отсекот „Гинеколошко-акушерска сестра“. Со своето образование ќе продолжи во Гевгелија зошто медицината е нејзината определба, а таква струка нема во Делчево. Ќе продолжи да тренира, да спортува и да се подготвува за својот професионален предизвик како акушерка која ќе дочекува во свои раце нов живот. До тогаш нека се чува гол линијата на екипите со кои ќе се соочи РК „Делчево“, зошто темпераментната Ружица има многу што да покаже на теренот.
Трансферот на Ружица во боите на „Делчево“ е четврти по ред трансфер на ракометарки од ЖРК „Гевгелија“ во екипи од други градови во државата.
Следен петти по ред трансфер е најавен повторно во боите на РК „Делчево“, каде ја очекуваат Јована Георгиева, исто така ракометарка од ЖРК „Гевгелија“.
Ракометниот клуб Делчевo е формиран 2011 година од страна на Горан Велков, дипломиран професор по физичко и здравствено образование. Целта на формирањето е развивање на свеста кај младите за спорт и посветување повеќе внимание на спортските активности. Ете, вистински терен за спортскиот предизвик и за ракометарките од Југот.
СРЕЌНО!
