Еден златен и еден бронзен медал е резултатот од првото деби учество на гевгелискиот атлетичар Влатко Семенаков на Балканското првенство во атлетика што се одржа денеска во Белград, Србија.
Тој освои ПРВО место на трката од 1500 метри која што ја истрча со најдобро време од 4:45 минути. Оваа трка ја истрча во 14 часот.
Претходно Семенаков, атлетичар од Гевгелија, во 12:15 часот истрча и на патеката од 60 метри која што ја совлада за време од 8:48 секунди, што беше трето најдобро време и освои бронзен медал.
Семенаков се натпреваруваше во М40+ категоријата каде што беше неприкосновен во својата возрасна атлетска конкуренција на Балканското првенство во атлетика за ветерани.
Ова е засега круната во атлетските настапи на Семенаков кој со своите резултати на атлетските патеки денеска испиша историја за гевгелиската атлетика, искачувајќи се на два подиума во само еден ден, во конкуренција на атлетичари од целиот Балкан.
Втор претставик од Македонија на денешното Балканско првенство во Белград беше Игор МЦ Јакимовски (тренер на нашиот маратор-олимпиец, Дарио Ивановски). Јакимовски настапи на трката од 1500 метри во М45+ категорија и освои Златен медал, со најдобро време од 4:42 минути.
Денешниот Балкански Атлетски Мастерс Опен-Белград, Р.Србија, што е Атлетско Балканско првенство на ветерани, со учество на атлетичари над 35 години продолжува и утре, недела.
Македонија ги има медалистите – од четворочлен тим, двајца учесника уште првиот натпреварувачки ден се качија на подиум, освоени се три медали, а две од нив доаѓаат со Влатко Семенаков во Гевгелија.
Целата организација и поттик за учество на гевгелискиот атлетичар Семенаков на ветеранскиот митинг во сала кој се одржува во Белград доаѓа од Игор МЦ Јакимовски кој пред извесно време оствари состанок со АК „7 Ноември“ и заеднички тренинг со Влатко и атлетичарите. Изборот токму Влатко да биде во репрезентативниот тим на Македонија заедно со Игор МЦ Јакимовски бил непогрешива одлука на овој искусен тренер и атлетска величина на Македонија.
Честитки Влатко! Честитки Игоре! Ова е значаен ден за атлетиката на Македонија и особено за атлетиката на нашата Гевгелија!
