Врнежливиот период во изминатата недела “истури” 90 литри водена маса на 1м2 во дојранскиот регион, а тоа придонесе за пораст на нивото на водата во Дојранското езеро за 10 сантиметри.
Пред дождовите нивото изнесуваше 58 cm над “0-та” котата, а денеска е 68 сантиметри.
Природата се погрижи езерото да се полни и самото да ја храни и одржува езерската флора и фауна. Да потсетиме, во ноември минатата година езерото се соочуваше со пад на нивото, така што пред пуштањето на пумпите од системот кај Ѓавото, езерото беше 39 сантиметри под „0-та“ кота, под границата на биолошка одржливост. Пумпите работеа неколку дена, нивото се покачи за 5 сантиметри, а по настанат дефект истите пак беа запрени. Остана езерото сам да се грижи за себе во договор со природата.
Денеска нема врнежи, па езерото мирува, иако облаците веќе се гушкаат со Беласица се’ додека не го истурат тешкиот воден товар.
Освен дождовите кои паднаа на езерската површина, езерото се полни и од природните водотеци. Доказ е течението на т.н. Стара река, која од подножјето на Беласица, поминува кај с.Николиќ, дојранско и се влева во „Николич бич“. Полека, полека, преку плажата директно во езерото. Видеото ни’ го испрати нашиот читател Костадин Ласов од Николиќ.
