Измина еден месец откако генералниот секретар на Црвениот Крст на Македонија д-р Саит Саити најави дека Гевгелија ќе биде домаќин на Регионалниот натпревар по „Прва помош“, настан кој секоја година се одржува под покровителство на ЦК на Македонија, а во организација на Црвениот крст од градот домаќин..
Тоа значи дека градот на југот ќе биде центар на помошта, хуманоста, солидарноста која може да ја пружат обучените луѓе на Црвениот крст, доброволците, волонтерите.
Носител на подготовките е Општинската организација на Црвен Крст Гевгелија, па го запрашавме секретарот Лазар Мешков како течат подготовките.
– „Црвениот Крст Гевгелија се подготвува да пречека над 300 членови на Црвениот крст од државата, натпреварувачи на Регионалниот натпревар за прва помош, волонтери и помошни лица за реализација на натпреварувачкиот дел, кој е закажан за 10 мај 2025. Ова е настан кој се организира секоја година во различен град, а честа оваа година ни припадна нам како ЦК Гевгелија да бидеме домаќини на овој важен настан“ – ја образложува Мешков важноста на домаќинската улога на ЦК Гевгелија, доверена заради високи достигнувања во текот на изминатата година во сферата на своето делување.
– „На натпреварот учество ќе земат 16 тимови за прва помош од 15 градови од државата, а едно место има и тимот на градот домаќин, Гевгелија. Секоја екипа ќе има задача да пристапи да пружи прва помош во рок од 15 минути на лица кои ќе симулираат различни повреди, скршеници, отворени рани, епилептични напади, мозочни удари, изгореници… итн. Секој тим ќе треба да реши три различни ситуации на повредени лица и да пружи соодветна прва помош. Нивната работа ќе ја следи стручен тим и главниот судијски тим“ – го објаснува текот на натпреварот секретарот Лазар Мешков.
Тој додава дека: „Освен 100-ната учесници на натпреварите ќе бидат вклучени и 40 манекени кои ќе бидат нашминкани за да ја прикажат повредата која што натпреварувачите треба да ја санираат со примена на мерки по прва помош“ – објаснува секретарот на ЦК Гевгелија кој веќе еден месец е во организаторски жар за подготовка на Регионалниот натпревар.
Некогаш во Гевгелија таквите натпревари се организираа на градскиот стадион, на ракометното игралиште, а оваа 2025 година организаторите планираат настанот да биде јавно пристапен за публиката.
Знаењето како да се пружи прва помош беше еден од факторите 19 годишниот херој Јован Костадинов од Виница да извлече 21 младо лице од опожарената дискотека во Кочани и да не го загрози својот живот. На прашањето како се снашол одговори дека му помогнало многу знаењето по прва помош од обуката која што ја поминал две недели пред настанот, а се спремал за полагање на возачки испит.
Значи, граѓаните на Гевгелија се добредојдени да го проследат натпреварот и да се потсетат на вештините како се пружа прва помош, во какви ситуации како се пристапува.
Првенството ќе се одвива на локација во централното градско подрачје на улицата „7 Ноември“ од Амам до кафиќ „Центар“ еден дел, а другиот дел ќе се одвива од кафиќ „Корзо“ долж шеталиштето до кафиќ „Арт“.
– „За Црвениот Крст и за првата помош одсекогаш биле важни волонтерите, доброволците кои сакаат да се вклучат во хуманата мисија на нашата организација. Испративме допис до училиштата во Гевгелија дека бараме волонтери да ни’ се придружат на настанот, било како манекени (статисти кои ќе глумат повредени лица), било како водичи на тимови, било како помошни насочувачи на учесниците и публиката која ќе ги следи настапите од натпреварите. Во оваа прилика сакам да им порачам на младите дека е добредојдена нивната вклученост во настанот, бидејќи секое учество носи нови знаења“ – изјави Мешков.
До настанот има уште месец дена, а рокот за пријавување на волонтери трае до 14 март. Повелете млади, вклучете се во организационата помош на домаќинот, Црвен Крст Гевгелија, станете волонтер, водич, помошник, или манекен на настанот и учествувајте во најхуманитарниот ден во Гевгелија.
Црвениот крст настана во виорот на Втората Светска војна, а официјалното формирање во Македонија е во 1945 година, поради што настанот ќе има и јубилејно значење во одбележувањето на 80 годишнината од основањето на Црвениот крст на Македонија.
Волонтери, приклучете се!
