Виолета го подготви најубавото слатко од диви зелени смокви на денеска одржаниот Фестивал на дивите смокви во с.Стојаково, богданско. Таа доби медал за учество на фестивалот и Диплома и победнички Пехар за најуспешен учесник и највкусно подготвено слатко.
На денешниот фестивал учествуваа пет екипи со вкупно 10 учеснички кои со подготовките на слаткото започнаа во дворот на Домот на културата во Стојаково.
Настанот освен како празник на слаткото беше замислен да биде и дружење и пренесување на традициите на старите домашни рецепти на помладите генерации. Така уште вчера младите собираа диви зелени смокви од поднебјето на Стојаково, ги засекуваа дршките, ги измија смоквите, а денеска се запали огнот, се подгреа водата и зовреа смоквите во араниите.
За културниот дел од програмата беа задолжени младите фолклористи, членови на КУД „Бранд Петрушев“ секција Стојаково.
Настанот се очекува да добие традиционален карактер и да заживее на овие простори секоја година во сезоната кога излегуваат плодовите на дивите смокви во овој крај.
