Синоќа во големата фестивалска сала „Јанко Узунов“ во Валандово се одржа 38-то издание на фестивалот на новосоздадена македонска песна „Фолк Фест Валандово 2025″.
Во финалниот избор за победничкиот пехар и најдбра песна на фестивалот влегоа 22 композиции, творени во духот на македонската фолк музика.
Со најмногу гласови од публиката и жирито за победник на Фестивалот е прогласена композицијата „Љубовта да расцути“ изведена од Сузана Гавазова и Љубчо Ѓоргиев. Песната е авторско дело на Миле Барбаровски, по текст на Ѓорѓи Барбаровски, а аранжманот е на Дарко Илиевски. Тие добија најмногу гласови и од стручното жири, и од публиката, со чии гласови беше избран победникот.
Слушнете рефрен од победничката песна на Гавазова и Љупчо.
Второпласирана според гласовите на публиката е композицијата “Што си ветивме” која ја исполнија Василија Петрова и Благоја Грујовски.
Третото место и’ припадна на композицијата “Дојди” во изведба на Смиља Митровска, долгогодишна изведувачка на музички настани и кај нас во Гевгелија.
Награда за животно дело постхумно беше доделена на Гоце Арнаудов, за се’ што создал на македонската музичка сцена и вредноста што ја оставил зад себе.
Струмичани горди на наградата за нивниот истакнат сограѓанин, музичар, еднакво успешен и во рокот, но со народните песни стана сеприфатен и незаборавен.
Во ревијалниот дел, свој настап имаше еден од доајените на македонската фолк песна, Перо Христов.
Фолк Фест – Валандово три дена ја подготвуваше публиката за фестивалската фешта со бројни гости кои настапија на јавна сцена во центарот на Валандово, бесплатно уживање за љубителите на музиката, модерните звуци, нашите македонски поп уметници и ДЏ-и. Забавата траеше и блескаше низ Валандово овој викенд.
Затоа валандовчани велат дека „Фолк Фест Валандово“ е симбол на заедницата и традицијата која ја негуваат и надградуваат генерации наназад, македонски музички уметници. Фестивалот има исклучително културолошко значење и истиот е дел од нашата идентитетска посебност, негувајќи го народното трворештво со нови препеви, нови звуци, а истиот македонски незаборавен мелост кој опстојува со векови.
