Празничната неделна раздвиженост на патиштата донесе една сообраќајна несреќа во гевгелиско со тешки телесни повреди на две лица, како и затекнати возачи со недозволена количина алкохол во крвта поради што не само што биле исклучени од сообраќајот туку и биле приведени во полиција.
Во неделата, на 25.05.2025 во 12:50 часот во ОВР Гевгелија е пријавено дека на регионалниот пат с.Смоквица-с.Прдејци, гевгелиско, патничко возило „Даеву Матиз“ со гевгелиски регистарски ознаки, управувано од Л.С.(43) од с.Ѓавато, општина Богданци, излетало надвор од коловозот.
Во несреќата со тешки телесни повреди се здобила Л.С. и нејзиниот сопатник К.С.(45), констатирани во Општа болница Гевгелија.
Извршен е увид од увидна екипа од ОВР Гевгелија.
Истиот неделен ден , приведен е валандовец, бидејќи управувал возило под дејство на алкохол и предизвикал сообраќајна незгода
На 25.05.2025 во 12:30 часот на ул.„Првомајска“ во Валандово, полициски службеници го лишија од слобода Ѓ.Д.(59) од Валандово. Имено, претходно тој со патничко возило „сеат“ со валандовски регистарски ознаки, кое го управувал, удрил во столб, а по преземени мерки и вршење увид, полициските службеници констатирале дека е под дејство на алкохол, односно дека има 1,60 промили алкохол во крвта.
Тој веднаш е исклучен од сообраќај и задржан во полициска станица, а по целосно документирање на настанот против него ќе биде поднесена пријава по член 297-а од Кривичниот законик – „безобѕирно управување со моторно возило“.
Истиот неделен ден, вечерта, лишен е од слобода 71 годишен жител на општина Валандово затоа што управувал возило под дејство на алкохол.
Во полицискиот извештај е заведено дека, на 25.05.2025 во 21.54 часот кај место викано „Монопол“ во Валандово, полициски службеници од ОВР Валандово го лишија од слобода Т.П.(71) од с.Пирава, валандовско. При контрола во патниот сообраќај, полициските службеници сопреле патничко возило „Фолксваген Голф“ со велешки регистарски ознаки, кое го управувал, и по преземени мерки констатирано е дека е под дејство на алкохол, односно измерени му се 1,64 промили алкохол во крвта.
Тој е исклучен од сообраќај и задржан во полициска станица, а по целосно документирање на настанот, против него ќе биде поднесена пријава по член 297-а од Кривичниот законик – „безобѕирно управување со моторно возило“.
