На ден Спасовден, патронот заштитник на Гевгелија, млад 38 годишен гевгеличанец се претсави пред ангелите. Почина Сотир Хаџи-Николов, 38 годишен жител на Гевгелија.
Сотир Хаџи-Николов е пронајден вчера претпладне починат во неговиот дом. За неговата смрт денеска се огласи и МВР со извештај од полицискиот дневник, во кој е наведено следново:
На 28.05.2025 во 11:20 часот во ОВР Гевгелија е пријавено дека во семејна куќа во Гевгелија е пронајден починат С.Х.Н.(38) од Гевгелија.
Лекар од Итната медицинска помош констатирал смрт, без видливи траги на насилство.
По наредба на јавен обвинител, телото на починатиот е предадено за обдукција. Извршен е увид од увидна екипа од ОВР Гевгелија.
Сотир потекнува од уметничко семејство. Тој е син на познатиот гевгелиски уметник Драги Хаџи-Николов, некогашен Претседател на Советот на општина Гевгелија и поранешен професор по уметност во СОУ „Ј.Јосифовски“. Негова тетка е Гордана Хаџи-Николова, познат уметник вајар од Гевгелија која исто така почина млада.
Сотир имаше широки погледи на светот со слободата на својот уметнички ген кој го обликуваше во мир и пацифизам. Дипломирал на Факултетот за ликовни уметности во Скопје, отсек сликарство. Беше член на Друштвото на ликовни уметници од Гевгелија и на културниот центар „Мултимедија“. Учествуваше на домашни и меѓународни изложби и ликовни симпозиуми, претставувајќи ги своите дела како во Македонија, така и во Бугарија, Турција, Грузија, …. зошто уметноста нема граници на творење, ширење и разбирање меѓу народите.
Од 2015 година Сотир беше вработен во Националната установа „Музеј“ Гевгелија. Од НУ денеска се простуваат од својот колега преку социјалните мрежи и најавуваат дека вечерашната изложба на Друштвото на ликовни уметници на Гевгелија која ќе се одржи во галеријата „Амам“ ќе биде посветена на Сотир.
Погребот на Сотир ќе се одржу утре во 13 часот на градските гробишта во Гевгелија, а посмртниот одор за опрост од сите роднини и пријатели ќе биде изложен во Градската капела од 12:00 часот.
Нека почива во мир.
