На првиот ден од јуни, ден недела во с.Николиќ, општина Дојран беше осветен големиот метален крст што се надвишува над селото, како заштитник на христијанското население во ова населено место.
Крстот е висок 7 метри, широк 3,5 метри, направен е од метална конструкција и осветлен. За извор на електрична енергија се поставени сончеви панели кои го напојуваат осветлувањето на Светиот Крст. Локацијата на крстот е над селото Николиќ од северната страна и ноќе го осветлува селото, а видикот му е целата широчина на Дојранското езеро и крајбрежјето.
Чинот на осветувањето го изврши отец Теофил Црневски, свештеник во црквата „Св.Ѓорги“ од Нов Дојран, намесник на Струмичкото Архиерејско намесништво.
На Свечениот чин присуствуваа жителите на с.Николиќ, претставници на Месната заедница, изведувачите и донаторите на оваа света идеја. Беше кршен и празничен колач, а молитвен благодет од отецот добија сите присутни.
ВИДЕО од осветувањето, погледнете во прилог:
Одбор на граѓани од Николиќ учествуваа со донација за осветлувањето на крстот, истиот е направен од Костадин Ласов и фамилијата, а сончевите панели за извор на електрична енергија се донација од „БР-Транспорт“.
Убавиот свет ден за жителите на Николиќ заврши со празничен ручек во дворот на црквата „Св.Петка“ во с.Николич и сенародна забава со песни и ора на игралиштето во населеното место.
Да е за навек убавиот настан и закрилата на николичани од Светиот христијански Крст, да ги поттикнува на добри мисли, добри дела, напредок и развој на домаќинствата и нивното место, кое го будат зраците сонце со првиот одсјај на водите од Дојранското езеро, го испраќа сонцето зад ридовите, а ќе ги грее ноќта Светоста на Големиот христијански Крст!
