Духовденската задушница гевгеличани ја испочитуваа уште рано изутрина со посета на гробните места на починатите и принесување на задуша со зборовите „да им се најде“, „да им се најде таму каде престојуваат душите на починатите“.
Заупокоена Литургија во 07:00 часот отслужи свештеникот Влатко Бојков. Помен парастаси во 08:00 ч. отслужи протоереј – ставрофор Љупче Миланов заедно со ѓаконот Влатко Велевски.
А, гробните места на починатите со опевање на молитвениот спомен беа посетени од свештениците: протоереј – ставрофор Љупче Миланов, протоереј Крсте Шабанов, протоереј Русе Жекоски и свештеникот Влатко Бојков.
Церемониите на задушница во топлата Гевгелија започнаа на температура од 17 степени, а завршија со поздрав од сонцето на 30 степени. Ден топол, како за вистинска летна задушница.
Роднините принесуваа пченица и вино за да се чествува никулецот на животот и крвта Исусова, со верба дека почитувајќи ги сите христијански обреди упокоените ќе најдат мир и спокој во рајските предели каде битисуваат правените души на упокоените.
Гробишта стари, гробишта нови, болката за загубата е иста, а адетот еднаков за сите упокоени. Принесувајќи им задуша им искажуваме почит и благодарност што биле дел од нашиот живот.
Задушница (Мртва сабота, Мртвен, Мртвени дни) — деновите во кои според народните верувања душите на покојните предци и блиски доаѓаат од оној свет кај своите блиски барајќи од нив храна, пијалак, затоплување, чистење (капење) итн. Се верувало дека заборавањето на душите на покојните може да предизвика суши, поплави, немаштија, болести и други несреќи. Задушниците поврзани со Духовден се официјално признати од црквата, па биле прифатени и од народот. Ваквата средба со душите на починатите се обавува на гробовите со палење на свеќи, кадење на гробот, посипување на вино врз него.
На Задушница верните им даваат милостина на сиромашните во име на покојните и се молат за покој на нивните души.
