Ученикот Алекса Насковски од ООУ „Владо Кантарџиев“ од Гевгелија, вчера на одржаниот финален натпревар по раскажување во организација на Фондацијата „Ѓорге Марјановиќ“ освои ПРВА НАГРАДА и ваучер за неговиот покажан труд и прикажан талент во раскажувањето.
Финалето на натпреварот се одржа на 13 јуни 2025 на правниот факултет Јустинијан Први во Скопје каде Алекса во присуство на професори ментори, ученици учесници, членови на жири комисијата имаше свој раскажувачки настап во живо. За свое претставување Алекса одбра да раскаже од романот „Милосија“ на Ката Мисиркова Руменова, каде се раскажува за девојче од Егејскиот дел на Македонија, за корените, за спомените, за почитта кон семејството и семејната лоза.
На натпреварот се раскажува одбрана случка од омилена книга која на натпреварувачот му оставила најсилен впечаток, ја раскажува случката, а на најинтересниот, односно највозбудливиот дел ја остави ја публиката во неизвесност, завршувајќи со препорака самите да ја прочитат книгата за да ги дознаат деталите и пораката која ја носи книгата.
Еве го настапот на Алекса (снимката е аматерска, но го презентира моментот на претставување на Алекса на натпреварот по раскажување):
Ученикот од Гевгелија на натпреварот настапи под менторство на наставничката Елизабета Инадеска-од ООУ „Владо Кантарџиев“.
Победата е потврда за читачките навики и раскажувачките способности на Алекса.
Самиот натпревар има за цел да ги поттикне младите да стекнат навика за читање и да ги развијат своите способности за вербално изразување. Истовремено, со учествување во натпреварот учесниците се квалификуваат за запишување во Академијата за идни лидери во рамките на Фондацијата „Ѓорге Марјановиќ“.
Натпреварот е организиран врз основа на согласност од МОН донесена врз основа на позитивно мислење од БРО.
