Пламените јазици се шират, а ноќта се ближи. За да се стави под контрола пожарот кој беснее веќе 26 часа ЦУК испрати хеликоптер на помош на противпожарните единици на ТППЕ Гевгелија, ТППЕ Валандово и ДППД Дојран.
Вода се полни од езерото и се истура врз тешкодостапниот ридест простор обраснат со ниска шума.
Пожарот кај Асанли е еден од 9-те активни пожари во државата денеска, евидентиран како пожар кај с.Николиќ.
Мирен лет и прецизно истурен воден товар му посакуваме на пилотот за да запре огнената закана во близина на Дојранското езеро.
Инаку, пожарот кај Асанли е активен веќе втор ден
Веќе 27 часа гори ниско стеблеста шума во атарот на напуштеното селот Асанли, општина Дојран.
На терен се екипи на ТППЕ Гевгелија со 8 пожарникари и ПП возила, ТППЕ Валандово, ДППД Дојран, вработени на ШС “Кожуф” Гевгелија. Од утрово екипите излегоа на терен во обид да ја локализираат огнената наезда.
Пожарот е во близина на Асанлиска брана (водата што се гледа од снимката). Снимено е денеска околу 16 часот.
Ветрот присутен на терен не им помага на пожарникарите, туку го воспламнува горењето и го менува правецот на огнот. Во близина на опожареното подрачје се наоѓаат населеното место Николиќ на исток, с.Ѓопчели за запад, а на југ на оддалеченост од 5 км е Нов Дојран и туристичките населби долж Дојранското езеро.
Видео: Мухамет Амедов
По извршената интервенција на хеликоптерот густ чад се изви високо над опожареното подрачје во Асанли. Жителите на с.Николиќ загрижени: „Ќе биде ли ова втора будна ноќ за нив поради огнената закана која не е ставена под контрола?“. Видеото снимено приквчер укажува дека пожарот е близу до првите објекти од населбата Николиќ и никој не е рамнодушен по прашањето на пожарот во комшискиот атар.
