Веќе седми ден горат ридовите над селото Николиќ, во општина Дојран, а тамошните жители сведочат за Божјото чудо кое им ги зачува црковните објекти неопожарени, не уништени, иако насекаде околу селото беснее огнот.
Освен малата црква „Св. Петка“ сместена во долот помеѓу два рида за која вчера пишувавме дека останала неопожарена, иако огнот беснеел низ родовите, денеска го имаме сведоштвото на жители од Николиќ кои велат дека Светиот крст кој се наоѓа на 500 метри над селото е неопожарен и ден денеска секоја вечер свети и ја дава Божјата закрила на селото.
Опожарен е целиот ридест дел над селото, како и 6 километри должинска линија од селото до границата со Грција: „Изгорена е и гората, и лозјата, и земјоделските посеви, се’ е пеплосано, само куќите останаа неопожарени, заштитени и без човечки жртви, вели за GevgelijaNet, донаторот на Светиот крст заедно со МЗ од селото, Ластов Костадин.
Исто така, неопожарена е и малата црква параклис сместена во селските гробишта, оддалечена 200 метри североисточно на горниот дел од селото со поглед кон Грција, која е на источниот брег од Дојранското езеро. Овде се’ изгорено, трева, дрвена опрема, само малата црква параклис „Св. Никола“ сместена во селските горбишта останала негибната од огнот.
Жителите на Николиќ немаат одговор зошто е тоа така, освен дека се работи за Божјо чудо, или Божја закрила над Николиќ, неговите жители, куќите на домаќините и светите објекти изградени од селаните за опслужување на религиозни обреди, чествувања, слави и православни празнични одбележувања.
Николиќ, населба на северниот брег од Дојранското езеро, брои околу 700 жители, кое претежно се занимава со земјоделство, лозарство, градинарство, одгледување на маслинки. Вредните домаќини сведочат дека родот им е пеплосан, пред куќите на секоја стапка наместо земја имаат пепел, ама „Св. Петка“, „Св. Никола“ и Светиот Крст уште стојат негибнати, и’ пркосат на огнената закана и со светата жртва на Христос и црковните светци бдеат над селото.
И денеска од вкупно 14 пожари на отворен простор во државата активни се 4 пожари меѓу кои пожарот над с.Николиќ е еден од проблематичните за гаснење и активен веќе цела недела. Пет дена огнот се гаси и воздушно и од земја, но ветрот и понатаму разгорува стари згаришта, или пренесува искри на нова неизгорена шумска маса.
Ако помага Божјата милост ќе речеме: Амин Боже, да се спаси селото, планината, и селаните од нови непроспиени ноќи заради огнот кој се гледа од секој прозорец на домаќинските куќи, заради мирот кој им треба на луѓето, заради преморените пожарникари кои се секој ден на терен да интервенираат!
