Вчера на 16 јули 2025 година почина Крстина Делчева, првата председателака на Организација на жени на град Скопје ОЖС. Голем активист за заштита на жените и нивните права, иницијатор за обезбедување простор за ТРАНЗИТНА ЖЕНСКА КУЌА за жени жртви на семејно насилство. Членките на ОЖС ќе ја паметат по нејзината голема хуманост, принципиелност и човечка природа.
Со оваа објава на социјалните мрежи од страна на Дивна Змејковска, претседателка на Синдикалната организација на Организација на жени при УНАСМ беше обзнанено дека ненадејно и тивко замина од овој свет Крстина Делчева, родена Зарлинова, во с.Смоквица, во втората половина од минатиот век.
Како дете од послевоените генерации учеше посветено, заврши гимназија во Гевгелија, се остручи за финансии и сметководство, беше долги години раководител на секторот за финансии и сметководство при Јавното комунално претпријатие „Водовод“ во Скопје, подоцна финансов директор на претпријатието, кариерата ја заврши како директор на „Паркови и зеленило“ при ЈП „Водовод“, кое беше составен дел на комуналното претпријатие во Скопје.
Млада, полетна, полна со оптимизам и храброст грабеше напред во животот, беше активна во Организацијата на жените и остана со последните свои атоми посветена на каузата за жените како рамноправен и важен дел од општествената заедница.
Беше посветена сопруга, сакана мајка на две деца, син и ќерка, грижлива баба на своите внуци.
Не ги забораваше своите корени. Често доаѓаше да го посети своето сакано родно место Смоквица, своите роднини, братучеди, со кои живееше во детството, со кои се гледаше на семејни веселби, свадби, за празници кога песната ги зближуваше сите.
За нејзиното човекољубие, отвореност, спремност да помогне секому, за идеите и впуштањето во незапирлив од кон остварувањата зборуваат и многуте посвети за неа напишани на социјалните мрежи. Еве дел од нив:
– „Оваа е жена која го истрасира патот на генерации жени кои денес како така имаат некој избор за разлика од генерациите на Кристина. Вистинска хероина Нека и’ е лесен патот во вечноста и огромно благодарам за нејзината борба за сите нас ♥️“ – напиша Билјана Несторова.
– „ Нека почива во мир нашата Тина. Горди сме сите смоквичани на нејзиното дело. Сочувство до фамилијата 😭😭😭“ – напиша Виолета Праматарова Христова.
– „Драга Кристина – драга пријателке. Остави голема празнина во нашите срца. Ти не беше само голем борец за женските права, туку и голем другар, пријател и хуманист. Осниваше мрежа на женски организации низ целата држава и им го подигна моралот на многу онесправени жени. Многу ќе ни’ недостасуваш. Нека ти е светол патот до вечното почивалиште. Почивај во мир. Сочувство до семејството“ – напиша Василка Цветковска.
– „Принципиелен способен човек со високи човечки квалитети, нека почива во светлина, сочувство до семејството“ – (Evuska Elezovikj).
– „Почивај во мир драга Кристина, ти беше мојата учителка за ова што го работам денес. Нека ти е светол патот кон вечното почивалиште“ (Loza Ilieska).
Тина, како што ја викат роднините и блиските, ќе остане запаметена како непокорлив борец за правата на жените, раководител кој водеше грижа за работниците, жена која негуваше особена посветена грижа кон децата, мил семеен лик, сакана мајка, тетка и баба.
Мило ни’ е што од нашиот крај се раѓаат така успешни жени, докажани професионалки и граѓански активистки, на кои сограѓаните со гордост се сеќаваат и паметат.
Светол ти пат Кристина! Смоквица не те заборава, Гевгелија те памети како гимназијалка, Скопје ќе се сеќава на твоите дела.
Биди нова светлина меѓу ангелите!
