Посветено по повод 50 годишнината од младинското акцијаштво во Гевгелија
Младинските работни акции, (на српско-хрватски Omladinske radne akcije, скратено ORA) биле начин на организирано едукативно-активно осознавање на младите од некогашната СФРЈ со трудот и потребата од општествен придонес кон изградбата на земјата после ослободувањето од ВСВ.
Тоа биле организирани доброволни активности на младите во Социјалистичка Федеративна Република Југославија, кои како акции биле искористени за изградба на јавна инфраструктура како што се патишта, железници и јавни згради, како и индустриска инфраструктура.
Во тој дух на воспитување и ангажираност на младата генерација во втората половина од минатиот век има свој белег и младината од Гевгелија со учество на бројни младинци на доброволни работни акции низ градилиштата во братските републики од заедничката држава Југославија.
На фотографијата е дел од младинската бригада на Гевгелија која учествуваше на Сојузната младинска работна акција (СМРА) Крагуевац 1977 година каде гевгелиските младинци доброволно учествувале во изградба на канал за наводнување и довод за Крагуевац и околината, Република Србија. На оваа работна акција учествувале гевгелиски младински бригади три години по ред 1976, 1977 и 1978 година.
Освен Крагуевац, гевгелиските младинци учествувале и на „ОРА Београд“ во изградбата на автопатот Белград – Ниш, на ОРА за изградбата на патот Катланово – Скопје и други.
Бригадите броеле по 50 истакнати младинци доброволци членови на Сојузот на социјалистичката младина на Македонија, Општинска организација Гевгелија, средношколци, истакнати работници, студенти. Во бригадите учествувале и младинки, девојки, околу 10% од составот.
Командант на бригадата бил истакнат младинец организатор, кој уживал доверба кај младите, со високи организациони способности. Во архивата на ССММ ОО Гевгелија забележани се носителите на функцијата командат на бригада Перо Цуклев од Миравци и Милош Мичо Николиќ од Негорци.
Ова е групна фотографија на свеченото испраќање на гевгелиската младинска бригада за Крагуевац 1977 година. Тие се испратени пред зградата на Општинскиот Комитет каде беа и мадинските простории на ССММ Гевгелија, а со свечен поздрав од Претседателот на ССММ ОО Гевгелија Ангел Алчинов, секретарот на ОО на ССММ Гевгелија Јованка Дојранлиева, Секретарот на Извршниот Совет на Гевгелија Томе Карајков.
На фотографијата ќе ги препознаете професорот Петко Смилков, Стојан Ризовски, Раденков, Ристо Ќорнаков тогаш гимназијалец, Пенка Стафидова…
Со желби за среќен пат и успешна работа сите се оптимистички насмеани пред поаѓање на работната акција. Но, желбите не беа само замисла туку и вреден ангажман на гевгелиските младинци. Во Белград гевгелиската бригада „Јосиф Јосифовски“ беше прогласена за најуспешна младинска бригада на акцијата. Признанието им беше доделено на гевгеличани во посебна пригода организиирана во Белград каде учествувала и делегација од гевгелиски младински функционери и од Извршниот Совет на општината.
Младите во работните бригади од Гевгелија активно учествуваа и на градилиштата и на сите вон работни активности во акцијашката населба: креирање на ѕиден весник, акцијашки вести, состаноци на младите во „Бригадно Собрание“, музика и песна покрај логорските огнови. Овде се раѓаа симпатии, другарства, пријателства кои траат со децении, а младоста и убавината носеше и титули за забава како прогласување на најубавата младинка акцијаш. Таква титула „најубава бригадирка, акцијаш“ на „ОРА Крагуевац 1977“ погодувате, беше убавината што ја носеа девојките од југот на СФРЈ, од Македонија, па ја понесе гевгелиската гимназијалка Станка Стефанова.
После Втората Светска Војна, акциите биле многубројни и масовни и младинските бригади дале значителен придонес во обновата на земјата, која била тешко уништена од војната. Покрај евтината работна сила за државата, младинските работни акции обезбедиле форма на бесплатен одмор за тинејџерите.
Работа, бесплатен одмор, другарство. Сепак, важни проекти беа изградени минатиот век од младинските работни акции како што се: железницата „Брчко-Бановиќи“, железницата „Шамац-Сараево“, делови од Нов Белград и делови од автопатот „Братството и единството“, кој се протега од северна Словенија до јужна Македонија.
Архивските податоци велат дека во текот на младинските работни акции, додека тие се изведувале после војната до 80-те години на минтиот век, биле ангажирани над два милиони младинци. Најголемите акции се одвивале после војната од 1942 до 1956 година. Потоа настапиле СМРА кои значеле младински агажман, работа, спознавања, другарство. Тие дале придонес во изградбата на многу инфраструктурни и јавни објекти во државата. Сојузното Собрание на СФРЈ во 1946 година го прогласи 1 април за Ден на младинските работни акции.
За сите некогашни младинци акцијаши еден другарски поздрав: „Акцијаши ЗДРАВО!“
Ви благодариме за трудот и вложеноста во изградбата на нашата тогашна заедничка држава со братските југословенски републики, СФР Југославија!
Градевте БРАТСТВО, градевте љубов, градевте држава!
