Од 29 пожари на отворен простор во текот на денешниот ден ЦУК јавува дека се изгаснати 19 пожари, 3 се под контрола, а 7 се се’ уште активни.
30-от неевидентиран пожар од страна на ЦУК е пожарот во атарот на с.Селемли, општина Богданци, кој избувна денеска околу пладне. Овде навремено интервенираше ТППЕ Гевгелија со две противпожарни возила и 4-ца пожарникари и пожарот е успешно изгасен околу 15 часот.
Според кажување на жителите на Селемли, очевидци на настанот, пожарот започнал од искра од трактор додека луѓето работеле на нива, балирале слама, па искрата ја потпалила сувата слама, околната сува трева, меѓи, ниви и блиски овоштарници.
Гледајќи дека неможат да го совладат огнот веднаш се јавиле за помош до гевгелиската Пожарна и екипата дошла најбрзо што можела, се фатила во костец со опожарениот простор и огнот го сузбила за време од три часовна интервенција..
Неуморните гевгелиски пожарникари речиси цел изминат јули се на терен во гаснење на големиот шумски пожар кај с.Николиќ, дојранско. Вчера гаснеа депонија за органски отпад во кругот на индустриски објект кај с.Прдејци, гевгелиско. Денеска кај с.Селемли, богданско.
Нема мир за гевгелиските пожарникари и покрај неиздржливите температури од над 40 степени Целзиусови. Затоа треба повеќе внимание и одговорност при престојот во природа од самите граѓани.
Во ова екстремно топло време, на присутна сува веѓетација, појавите на пожар од една искра можат да направат голема штета. Затоа од ТППЕ Гевгелија порачуваат да не се пали цигара, да не се фрлат отпушоци на отворен простор, да не се пали скара, или оган на отворен простор, зошто добрата намера за семеен помин може да заврши со голем шумски пожар.
Во случај да се забележи активност на оган или пожар на отворен простор веднаш да се јави на бесплатниот телефонски број 112.
ФОТО насловна: Поглед на пожарот кај с.Селемли од страната на Стојаково
