Празничниот ден Успение на Пресвета Богородица многумина го поминаа празнично со свечени трпези, на кои не е исклучено служењето и на алкохолни пијалоци, ама проблемот е ако после неколку чашки испиен алкохол седнуваат на волан и се вклучуваат во сообраќајот.
Тоа му се случило на 70 годишен жител на Богданци кој заради законските санкции завршил во притвор.
Во полицискиот извештај е наведено дека:
– „На 28.08.2025 во 17:25 часот на обиколница Богданци, полициски службеници од СВР Струмица- ОВР Гевгелија го лишиле од слобода Т.П.(70) од Богданци. При контрола на патниот сообраќај, полициските службеници сопреле патничко возило „Мазда“ со гевгелиски регистарски ознаки и по преземените мерки било утврдено дека Т.П. го управувал возилото под дејство на алкохол, односно дека имал 2.35 промили алкохол во крвта“, стои во извештајот од ОВР Гевгелија.
Т.П. е лишен од слобода и по целосно документирање на настанот, против него ќе биде поднесене кривична пријава за сторено кривично дело „безобѕирно управување со моторно возило“ по член 297-а од Кривичниот законик, известуваат од МВР.
Освен богданчанецот, во текот на вчерашниот празничен ден лишени се од слобода уште двајца алкохолизирани возачи, едниот од Штип, другиот од Крива Паланка, а возачот од Крива Паланка предизвикал и сообраќајна несреќа.
Еве што нотирала МВР за овие сообраќајни прекршоци за кои возачите завршиле во апс:
– На 28.08.2025 во 18:30 часот на ул.„Рибник“ во Штип, полициски службеници од СВР Штип го лишиле од слобода Н.И.(38) од Штип. При контрола во патниот сообраќај, полициските службеници сопреле патничко возило „Ровер“ со штипски регистарски ознаки, кое го управувал Н.И. и по преземени мерки било констатирано дека бил под дејство на алкохол, односно дека имал 3,07 промили алкохол во крвта.
На 29.08.2025 во 00:41 часот на ул.„Св. Јоаким Осоговски“ во Крива Паланка, полициски службеници од ОВР Крива Паланка го лишиле од слобода М.К.(24) од Крива Паланка. При увид на сообраќајна несреќа, во која тој учествувал со патничко возило „Јагуар“ со кривопаланечки регистарски ознаки, полициските службеници констатирале дека М.К. има 1,64 промили алкохол во крвта.
Лицата се лишени од слобода и по целосно документирање на настаните, против нив ќе бидат поднесени кривични пријави за сторени кривични дела „безобѕирно управување со моторно возило“ по член 297-а од Кривичниот законик.
