Спортската дисциплина „Goalball” стаса и на терените на Гевгелија, благодарение на иницијативата и спортскиот ентузијазам на членовите на Спортскиот клуб за слепи и слабовидни лица „АУРОРА“ од Гевгелија.
Денес „АУРОРА“ заедно со Здужението на слепи лица од Гевгелија беа домаќини на првиот реонски турнир во „Goalball” на кој учествуваа две екипи составена од членови на „Аурора“, машки и женски тим и две гостински екипи „Голбал визија“ од Кавадарци и „Атрофија“ од Струмица.
Се играше четворомеч. Првиот дуел го имаше машкиот тим на гевгелиска „Аурора“ со членовите од тимот „Голбал визија“ од Кавадарци. Првиот гол го постигна домаќинскиот тим на „Аурора“, а натпреварот заврши со резултат 9 : 11 за гостите од Кавадарци.
Вториот меч го одигра женскиот состав на „Аурора“ со тимот на „Атрофија“ од Струмица. И овој меч започна со првиот гол на женскиот тим од Гевгелија. Тие доминираа во првото полувреме со резултат 4:0, а натпреварот го добија со победа од 8 : 3 за „Аурора“.
Во вториот дел од турнирот екипите си ги заменија противниците. Женскиот тим на „Аурора“ играше против разиграните натпреварувачи од Кавадарци и постигнаа резултат 2 : 6 кој беше во корист на гостинскиот тим „Голбал визија“.
Конечниот пласман е следниот:
1. „Голбал визија“ Кавадарци – ПРВО место со две убедливи победи
2. „Аурора“ Гевгелија женски тим – ВТОРО место
3. „Аурора“ гевгелија машки тим – ТРЕТО место, и
4. „Атрофија“ Струмица – ЧЕТВРТО место.
Денот беше исполнет со спортска динамика на лицата кои животот го поминуваат во мрак, или со тешкотии во видот, а голбал натпреварите им овозможија раздвижување на теренот, еуфорија после постигнат гол, изострени сетила да се одбрани шутот на противничкиот тим и, на крајот, сето да прерасне во дружба, пријателство и убави спомени од заеднички поминатиот спортски ден во Гевгелија.
Инаку спортот „Goalball” веќе завзеде место и на Олимписките натпреварувања како официјална дисциплина, а во Македонија се формира национална лига од овој спорт која треба да започне од октомври со натпреварувачка сезона. Во тимовите за „Goalball” партиципираат лица со попречености во видот, а можат да им се придружат во играта и лица без проблеми во видот, ако ги почитуват правилата и ги користат очилата за „Goalball” кои ги штитат натпреварувачите од удари, но и го исклучуваат сетилото вид кај натпреварувачите, па се игра со слух, допир, ориентација преку излепените ленти на паркетот како простор кој играчот не треба да го напушти…
Овој спортски новитет во Гевгелија се реализира како проект на Здружението на слепи од Гевгелија помогнат од Фондацијата “Аполонија”од Гевгелија и Фондацијата “Ице Бегов” Скопје.
За иницијативата, организацијата, прифатеноста на проектот од локалната заедница изјава за GevgelijaNet дадоа Лазе Трајков (ЗС и СКСЛ „Аурора“) и Снежана Сарамандова (претставник на Фондација).
Успешната организација на денешниот турнир ги охрабри организатрите од „Аурора“ и Здружението на слепи од Гевгелија да се потрудат догодина турнирот да добие меѓународни димензии со учество на екипи од соседните земји.
Честитки за иницијативата, ангажманот, ентизијазмот и секако за убедливо уиграените победници за кои на турнирот дознавме дека се најдобрите во овој спорт „Goalball” во Македонија. Ете, се докажаа и во Гевгелија.
