Вкупно осуманесет лица биле примени синоќа во Општата болница во Кочани со повреди од пожарот што вчера доцна попладне избувна во фабриката за кандирани производи и вафли „Макпрогес“ во Виница, познат по брендот „Винчини“.
Дел од нив се задржани во болницата, а дел се препратени на клиниките во Скопје, изјави за МИА раководителката на одделението за анестезиологија и реанимација во Општата болница во Кочани, д-р Оливера Цимбаљевиќ.
Според неа, сите повредени во пожарот што се примени во кочанската болница се во стабилна состојба.
Дел од повредените имаат изгоренции на нозете, а дел инхалациони повреди од вдишување чад.
Петмина од повредените, како што вели таа, се наоѓаат на одделението за хирургија, од кои кај четворица се констатирани изгореници на нозете од прв и втор степен.
Таа не може да прецизира колкумина од повредените се пожарникари, а колку се вработени во фабриката „Макпрогрес”, но, како што вели, сите што се примени во кочанската болница се во стабилна состојба.
Инаку, како што вчера информираше директорот на Дирекцијата за заштута и спасување (ДЗС), Стојанче Ангелов, неколкумина пожарникари, без да наведе конкретна бројка, се здобиле со изгореници на стапалата откако се заглавиле во смола од стопен шеќер во еден од производните погони на фабриката.
Во врска со бројот на повредени денеска се огласи градоначалникот на Виница, Миле Петков, кој во изјава за државната новинска агенција вели дека во текот на синоќешниот пожар медицинска помош побарале 16 лица. Информацијата, како што изјавил тој, ја добил од Здравствениот дом во Виница.
Според неговите информации, во пожарот се повредени пожарникари, доброволци и вработени во фабриката.
Вистинска драма се одвивала кога пожарникари од Штип, Кочани и Свети Николе, кои влегле во жариштето на пожарот, останале заглавени во лепливата, жешка смеса. Според извори од терен, нивната соодветна заштитна опрема спречила уште потешки последици.
Во хаотичната акција за спасување, неофицијално, повредени се и дел од пожарникарите кои се обидувале да ги извлечат своите заглавени колеги.
На местото на несреќата, освен големиот број противпожарни возила, присутни се и повеќе амбулантни и полициски екипи кои помагаат во справувањето со состојбата и асистираат на повредените.
– „Според информациите од Здравствен дом Виница помош побарале 16 лица, дел од повредените се пренесени во Здравствен дом во Кочани, додека оние коишто имаат вдишано чад се пренесени во Клинички центар во Скопје. Здравствената состојба им е добра“, вели Петков.
Тој изјавил дека пожарот во фарбиката „Макпрогрес“ е локализиран, а опожарени се три погони и магацин на површина од околу 5 000 метри квадратни.
Пожарот во фабриката, како што информираше синоќа Центарот за управување со кризи, бил пријавен во 18:40 часот преку единствениот број за итни случаи – 112. Стихијата, според ЦУК, избувнала во магацините и во производствените погони 6, 7 и 8 на фабриката, по што на терен веднаш излегле екипите на ТППЕ Виница со неколку противпожарни возила и пожарникари.
